वर्ल्ड ट्रेड सेन्टरमा तीज मेला

काठमाडौं । त्रिपुरेश्वरस्थित युनाइटेड वर्ल्ड ट्रेड सेन्टरमा १४ औँ संस्करणको तीज मेला बुधबारदेखि सुरु भएको छ । सो मेलाको एक कार्यक्रमका बीच अमन फाउन्डेसनकी अध्यक्ष तारादेवी गुरुङले उद्घाटन गरेकी थिइन् । कार्यक्रममा गुरुङले उद्यम व्यवसायमा महिलाको सहभागिता बढ्दो अवस्थामा रहेको र यस्ता मेला महोत्सवले उद्यशीलता गर्न चाहने महिलालाई सहयोग गर्ने बताइन् ।

वर्ल्ड ट्रेड सेन्टरको चौथो तल्लामा डीईसीसी नेपालले एएस इभेन्ट्स एन्ड मार्केटिङसँगको सहकार्यमा तीज मेलाको आयोजना गरेको हो । १० गतेसम्म चल्ने मेलामा १०० भन्दा बढी स्टल रहेका छन् । तीजका लागि आवश्यक पर्ने सबै सामानका साथै महिलाहरूलाई एकै स्थानमा दैनिक प्रयोगका सामान सस्तो मूल्यमा किनमेल गर्नका लागि मेलाको आयोजना गरिएको डीईसीसीकी बजार प्रबन्धक स्मृति श्रेष्ठले बताइन् । नेपालका साथै भारत, पाकिस्तान, बंगलादेश र अन्य देशका स्टलहरू मेलामा छन् । मेलामा लत्ता कपडा, कस्मेटिक, चुरा पोतेका साथै अन्य सामग्री बजार मूल्यभन्दा सस्तोमा खरिद गर्न सकिनेछ ।

मेलामा अवलोकनकर्ताहरूलाई आकर्षक उपहारको समेत व्यवस्था गरिएको कम्पनीले जनाएको छ । ट्रेड सेन्टरमा रहेका रेस्टुरेन्टहरूमा अवलोकनकर्तालाई छुटको व्यवस्था गरिनुका साथै विभिन्न किसिमका सामग्रीहरूमा भारी छुटको व्यवस्था गरिएको डीएसीसीले जनाएको छ । अवलोकनकर्तालाई फुड भौचर तथा डिस्काउन्ट भौचर उपलब्ध गराइने मेलाको २० हजारभन्दा बढीले अवलोकन गर्ने अपेक्षा आयोजकको छ ।