एमके ग्रुपद्वारा रिटेलर मिटमा नयाँ उत्पादन लन्च

काठमाडौं । एमके ग्रुपको नेपालका लागि आधिकारिक वितरक सत्यदिप इन्टरनेसनलले रिटेलर मिटको आयोजना गरी नयाँ उत्पादनहरू सार्वजानिक गरेको छ । कम्पनीले हालै उत्पादन प्रारम्भ गरिएको पेपर क्लच एसेम्बली, क्लच एन्ड ब्रेक लिभर तथा योक, नन–एस्बेस्टस ब्रेक सु र क्लच भेरिएटर लन्च गरेको हो ।

देशभरका रिटेलर सहभागी सो कार्यक्रममा एमके क्लचका म्यानेजिङ डाइरेक्टर नितिन भण्डारीले एमके ग्रुप र यसका उत्पादनको बारेमा जानकारी प्रस्तुत गरेका थिए । एमके क्लचका एक्सपोर्ट्स हेड योगेश काल्रा तथा सत्यदिप इन्टरनेसनलका म्यानेजिङ डाइरेक्टर दिपेन्द्र मिश्र र मार्केटिङ डाइरेक्टर सञ्जिव हमालले सहभागीलाई स्वागत गर्दै सवारीमा प्रयोग गरिने विभिन्न पार्ट्स गुणस्तरीय हुनुपर्ने र सबै रिटेलरहरूले गुणस्तरीय सामग्री उपलब्ध गराउनका लागि भूमिका खेल्नु पर्ने बताए । सो अवसरमा रिटेलरहरूका लागि नयाँ स्किम समेत सार्वजनिक गरिएको थियो । सो स्किमअन्तर्गत एमकेका उत्पादन खरिद गर्ने रिटेलरहरूले हाल पाइरहेको छुटभन्दा थप पाँच प्रतिशत छुट प्रदान गरिने बताइएको छ ।

सवारीमा प्रयोग गरिने लिभर र योक, क्लच भेरिएटर, इनर क्लच एसेम्बलिज, कम्प्लिट क्लच एसेम्बलिज, ब्रेक सु, क्लच प्लेट, डिस्क ब्रेक प्याड र पेपर फ्रिक्सन प्लेटका लागि एमके ब्रान्ड लोकप्रिय मानिन्छ । दुई पाङ्ग्रे, तीन पाङ्ग्रे र चार पाङ्ग्रे सवारीका लागि आवश्यक अटोमोटिभ क्लच र ब्रेक उत्पादक कम्पनीको रूपमा लोकप्रिय एमकेले आफूलाई ‘लिडर इन फ्रिक्सन टेक्नोलोजी’ दाबी गर्दै आएको छ ।