युवाले ठूला सपना देख्नुपर्छ : एनसेल सीईओ जाब्बोर

काठमाडौं । एनसेलका प्रमुख कार्यकारी अधिकृत (सीईओ) तथा प्रबन्ध निर्देशक जाब्बोर कायुमोभले युवाहरूले ठूला सपना देख्नुपर्ने बताएका छन् । सपना देख्ने मान्छे मात्रै सफलता हासिल गर्न सक्ने उनको भनाइ थियो । नेपाल प्रज्ञा प्रतिष्ठानको सभाहलमा आयोजित ‘काठमाडौं युथ कन्क्लेभ (केवाईसी), २०८०’ मा सहभागी युवालाई प्रेरणा र प्रोत्साहन प्रदान गदै उनले युवालाई थप सिक्ने भोक र लगनशीलता हुनुपर्नेमा जोड दिए ।

युवाकेन्द्रित सो कार्यक्रममा विभिन्न शैक्षिक पृष्ठभूमि, समुदाय र भौगोलिक स्थानका करिब पाँच हजार युवाको सहभागिता थियो । यस वर्षको ‘केवाईसी’ संस्करणको विषय ‘इन्स्पायरिङ युथ, लिडिङ द नेसन’ थियो । जाब्बोरले कार्यक्रममा युवालाई प्रतिस्पर्धी बन्न, आफ्नो इच्छाअनुसार काम गर्न र त्यसलाई वास्तविकतामा परिणत गर्न प्रोत्साहित गरे । उनले भने, ‘प्रतिस्पर्धाले तपाईंलाई राम्रो बनाउँछ । राम्रा प्रतिस्पर्धीहरूले तपाईंलाई अझ राम्रो बनाउँछन् ।’

उत्साही युवाहरूसँग आफ्ना प्रेरणादायी यात्रा, नेतृत्वका मुख्य सिद्धान्त र अनुभव बाँड्दै जाब्बोरले योजनाको महत्व र लगनशीलतामा जोड दिनुपर्ने बताए । ‘यदि तपाईं अझ राम्रो गर्न चाहनुहुन्छ र ठूलो सफलता हासिल गर्न चाहनुहुन्छ भने तपाईंले सपना देख्नुपर्छ,’ उनले भने, ‘आफूले विश्वास गरेको कुरा सिक्ने जोस हुनुपर्छ र त्यसलाई भिजुअलाइज गर्नुपर्छ ।’ १६ देखि २५ वर्ष उमेर समूहका युवाहरूको सो भेलामा जाब्बोरले युवाहरूलाई लगनशीलताका साथ लक्ष्यमा अघि बढ्न प्रेरित गरे ।

कार्यक्रममा प्रख्यात नेत्ररोग विशेषज्ञ डा सन्दुक रुइत, चर्चित मास्टरसेफ सन्तोष शाह, ट्रेल रनर मीरा राई, ई–सेवाका सीईओ जगदीश खड्का, क्रिकेटर पारस खड्का र रूपेश्वर गौरा दासजस्ता प्रेरणादायी वक्ताहरू थिए । ‘व्यक्तिगतरूपमा युवासँग जोडिन पाएकोमा र उनीहरूको ऊर्जा देखेर म साँच्चै प्रेरित भएको छु । यस किसिमको सम्मेलनले युवा प्रतिभाको प्रवद्र्धनमा सहयोग गर्ने एनसेलको प्रतिबद्धतालाई बढावा दिन्छ,’ जाब्बोरले भने, ‘यस मञ्चमा आएर युवालाई प्रेरणास्वरूप केही कुरा राख्न पाएकोमा केवाईसी आयोजकप्रति आभारी छु ।’

विभिन्न क्षेत्रमा उल्लेखनीय सफलता हासिल गर्न सफल व्यक्तित्वको अनुभव र ज्ञान युवामाझ बाँडेर हौसला बढाउने यस सम्मेलनको प्रमुख उद्देश्य थियो । यो सम्मेलन युनिभर्सल कलेज र फिनिक्स कलेजको सहकार्यमा आयोजना गरिएको थियो ।