बास्तोला र सापकोटाको प्यानलबीच प्रतिस्पर्धा

काठमाडौं । नेपाल पर्यटक यातायात व्यवसायी संघ (एनटीभीए) को नयाँ नेतृत्वका लागि निर्वाचन हुने भएको छ । मंगलबार हुन लागेको वार्षिक साधारणसभामा वेदराज बास्तोला र प्रकाश सापकोटाले प्यानलै बनाएर सबै पदमा उम्मेदवारी दिएपछि नयाँ नेतृत्वको लागि निर्वाचन हुन लागेको हो ।

आइतबार भएको मनोनयन दर्तामा दुवै प्यानलले विभिन्न पदमा उम्मेदवारी दिएपछि निर्वाचन गर्न लागिएको निर्वाचन समितिले जनाएको छ । निर्वाचनमा बास्तोलाको प्यानलतर्फ वरिष्ठ उपाध्यक्षमा काभ्रेका व्यवसायी रमेश गौतमले उम्मेदवारी दिएका छन् । रमेश गौतमसँगै द्वितीय उपाध्यक्षमा विनोद तामाङ, महासचिवमा केदारनाथ कट्टेल, सचिवमा तेज लामा, कोषाध्यक्षमा रामकुमार बस्नेत, सदस्यहरूमा टेक पुन मगर, नकुल तिमल्सिना, राम आचार्य र नवराज अर्यालसहितको टिम निर्वाचनमा होमिएको हो ।

त्यस्तै, प्रकाश सापकोटाको टिममा भरतप्रसाद तिमल्सिना, शंक नारायण महर्जन, महासचिवमा अनिल मोक्तान, सचिवमा प्रमोद प्रसाद अर्याललगायतको उम्मेदवारी रहेको छ । संघसँग जोडिएका पूर्व टिमहरूले आफ्नो प्यानललाई समर्थन गरेको र अधिकांक मतदाताहरू आफ्नो पक्षमा खुलेरै लागेकोले बास्तोला प्यानलले सहजै चुनाव जित्ने दाबी सोही प्यानलबाट सदस्यका उम्मेदवार नवराज अर्यालले गरे । पूर्वअध्यक्ष रामशरण कार्की, पूर्वअध्यक्ष साङ्गे लामा, पूर्व प्रथम उपाध्यक्ष सुनिल श्रेष्ठ, पूर्व प्रथम उपाध्यक्ष राजकुमार लामा, पूर्व प्रथम उपाध्यक्ष भीम गोलेलगायतका अधिकांश यातायात व्यवसायीले आफ्नो प्यानललाई समर्थन जनाएको बास्तोला प्यानलको दाबी छ ।