‘दराज लाइक न्यु’को सुरुवात

काठमाडौं । अनलाइन मार्केट दराज नेपालले नयाँ उद्यम ‘दराज लाइक न्यु’ (डीएलएन) को सुरुवात गरेको छ । कम्पनीले हालै राजधानीस्थित हायात प्लेसमा एक कार्यक्रमको आयोजना गरी सो नयाँ उद्यमको घोषणा गरेको हो ।

बजारमा डीएलएनको परिचयले स्थानीय विक्रेतालाई सहयोग गर्ने मूल ध्येयका साथ यो नयाँ उद्यम सुरुवात गरेको दराजले जनाएको छ । दराजले यो प्लेटफार्मलाई प्रयोग गरिएका फोनहरू बिक्री गर्नका लागि प्रदान गर्ने बताइएको छ । यसले विक्रेतालाई उच्च गुणस्तर, मूल्य र मापदण्ड पूरा भएका फोनहरू किन्न सक्षम बनाउँछ । कार्यक्रममा त्रिभुवन विश्वविद्यालयका सहायक प्राध्यापक तथा ई–वेस्ट व्यवस्थापन अभियन्ता डा ज्योति गिरीले दराज र डीएलएनलाई ई–वेस्ट न्यूनीकरण गर्नको लागि गरिएको भूमिकाको लागि प्रशंसा गरेका थिए । त्यसैगरी डीएलएनको लागि दराज प्लेटफर्ममा विक्रेता तथा ‘सबको फोन’का संस्थापक उत्तम काफ्लेले प्रयोग भएका फोनको बिक्री वितरणमा ढाडस पुग्ने भन्दै प्लेटफार्म उपलब्ध गराएकोमा दराजप्रति आभार व्यक्त गरे ।

कम्पनीका अनुसार डीएलएनले प्रयोग गरिएको फोनहरू प्रदान गर्ने मात्र भन्दा पनि ग्राहकको लगानीमा पारदर्शिता प्रदान गर्नका लागि बिल पनि समावेश गर्नेछ । दराज नेपालकी प्रबन्ध निर्देशक आँचल कुँवरले किनमेलमा मात्र नभई समाजमा योगदान पु¥याउन पनि दराज सधैँ अगाडि रहेको बताइन् । ‘हामीले हाम्रो प्लेटफार्ममार्फत गुणस्तरीय प्रविधि धेरैभन्दा धेरै मानिसलाई पहुँचयोग्य बनाउँदै अव्यवस्थित बजारलाई व्यवस्थित गराउँदै दिगोपनलाई पनि सन्तुलनमा राख्ने लक्ष्य राखेका छौँ’, उनले भनिन् ।

दराज लाइक न्युले बजारमा नयाँ परिवर्तन, गुणस्तर र लाभदायी मूल्यमा सामान प्रदान गर्ने प्रण गरेको छ । यस पहलले ग्राहकलाई प्रयोग गरिएका फोनहरूको अवधारणा उजागर गराउँदै उनीहरू माझ यसप्रतिको विश्वास र सन्तुष्टि जगाउने बताइएको छ । यही पहलमार्फत दराज नेपालले टिच बजारमा गुणस्तरीय, किफायती र दिगो उन्नतितर्फ अग्रसर गराउने योजना तयार गरेको दाबी गरेको छ ।