सामसङले नेपालमा फाइभजी प्रविधि सुरु गर्ने

काठमाडौं । सामसङले नेपालमा फाइभजी प्रविधि सुरु गर्ने तयारी गरेको छ । स्मार्टफोन ब्राण्ड सामसङ नेपालमा आविष्कारको क्षेत्रमा सधैँ अग्रणी रहँदै आएको छ । कम्पनीका अनुसार स्मार्टफोनको दुनियाँमा नयाँ उन्नत नवीनतम प्रविधि भित्र्याउनुमा सामसङको अलग्गै प्रतिष्ठा रहेको छ ।

नेपालका दुई प्रमुख टेलिकम कम्पनीहरू नेपाल टेलिकम र एनसेलको नेपालभर विभिन्न ब्याण्ड र फ्रिक्वेन्सीहरू सञ्चालनमा छन् । अहिले नेपालमा सञ्चालनमा रहेका सबै समान ब्याण्डहरू टु जीको लागि ब्याण्ड ८ (९०० मेगाहर्ज), थ्री जीको लागि ब्याण्ड १ (२१०० मेगाहर्ज), फोरजीको लागि ब्याण्ड ३ (१८०० मेगाहर्ज) सबैसँग सामसङद्वारा समर्थित छन् । नेपाल टेलिकमले भोल्टी विस्तार गर्ने दौरानमा आफ्नो एलटिई÷फोरजी नेटवर्कलाई साथ दिन एक अतिरिक्त समान ब्याण्ड २० (८०० मेगाहर्ज) प्रस्तुत गरेको थियो । सामसङद्वारा यसको परीक्षण गरिएपश्चात् आफ्ना उपकरणमा सामसङले त्यसको प्रयोग पनि गरेको थियो । यस लगत्तै सन् २०२० देखि नेपालमा सामसङ ब्याण्ड २० समर्थित पहिलो मोबाइल ब्राण्ड बनेको हो ।

यस्तै, देशमा फाइभजी प्रविधि भित्र्याउने सन्दर्भमा पनि यी दुवै टेलिकम सञ्चालकसँग पनि कम्पनीले निरन्तर काम गर्दै आइरहेको जनाएको छ । नेपालका टेलिकम कम्पनीले फाइभजी नेटवर्क सुरु गर्ने दिशामा कार्य गरिरहेका छन् । देशमा सञ्चालित सबै नेटवर्क सञ्चालकले यो प्रविधिको व्यावसायिकरण गरेसँगै प्रयोगकर्ताहरूले आफ्नो फाइभजीको लागि तयार रहेको उपकरणहरूमा अन्ततः तीव्र गतिको इन्टरनेट सेवाको मजा लिन सक्ने कम्पनीले जनाएको छ । कम्पनीले केही समयअघि मात्र अत्यन्त सुलभ मूल्यको फाइभजी स्मार्टफोन सामसङ ग्यालेक्सी एम१४ फाइभजी बजारमा उपलब्ध गराइएको बताएको छ । सामसङले फाइभजीको लागि तयार उपकरणहरू उपलब्ध गराउन तयार रहेको जानकारी पनि गराएको छ । साथै, यी उपकरणहरूमा रहेको फाइभजी सुचारु गर्न नेटवर्क सञ्चालकले फाइभजी सुरुवात गर्ने दिनको पर्खाइमा रहेको उल्लेख गरेको छ ।

यस्तै, सामसङले सन् २०२१ देखि नै फाइभजीको लागि तयार विभिन्न मूल्यका स्मार्टफोन उपलब्ध गराउँदै आएको जनाएको छ । कम्पनीले स्मार्टफोन प्रविधिलाई उन्नत बनाउन पहुँचयोग्य दायरामा पाइने फाइभजी नेटवर्किङ क्षमताका साथ निर्माण गरिएका सामसङका फोन वा सामसङको कनेक्टेड इकोसिस्टमका साथ विश्वलाई नजिक ल्याउन काम गर्ने उल्लेख गरेको छ ।