उपकरण बिग्रँदा हेटौँडा सिमेन्टको उत्पादन बन्द

मकवानपुर । हेटौँडा सिमेन्ट उद्योगको आगो बाल्ने भट्टीमा जडान गरिएको कोलमिलको उपकरण बिग्रिँदा सिमेन्टको उत्पादन बिहीबार बिहानदेखि बन्द भएको छ । हेटौँडा सिमेन्ट उद्योगका नायब महापबन्धक नवीनकुमार कर्णले आगामी ३–४ दिनभित्रै उक्त उपकरण मर्मत गरेर सिमेन्ट उत्पादन सुरु गर्ने तयारी भइरहेको बताएका छन् ।

उद्योगमा कोइलाको अभावले करिब दुई महिना बन्द गरेर दुई हप्ताअघि मात्रै पुनः सिमेन्ट उत्पादन सुरु गरिएकामा फेरि प्राविधिक समस्या आउँदा सिमेन्टको उत्पादन बन्द गर्नुपरेको उद्योग प्रशासन महाशाखाका अधिकृत शत्रु अर्यालले जानकरी दिए ।

उद्योगमा अहिले पर्याप्त मात्रामा कोइला र चुनढ्ङ्गा जगेडामा राखिएको छ । उद्योग व्यवस्थापनले अहिले दैनिक १० हजार बोरा सिमेन्ट सो उद्योगले उत्पादन गर्दै आएको जनाएको छ ।