उद्योग वाणिज्य महासंघले लगानी सम्मेलन गर्दै

बागलुङ । नेपाल उद्योग वाणिज्य महासंघले मुलुकको अर्थतन्त्रलाई चलायमान बनाउन र लगानीका सम्भावनालाई उजागर गर्न सातै प्रदेशमा लगानी सम्मेलन गर्ने भएको छ । बागलुङ जिल्लाको प्रमुख पर्यटकीय क्षेत्र ढोरपाटनमा बसेको महासंघको तेस्रो कार्यसमिति बैठकले सो निर्णय गरेको हो । प्रचुर सम्भावना भएर पनि पूर्वाधार र प्रचारप्रसारको अभावमा ओझेलमा परेको ढोरपाटन क्षेत्रको प्रचार गर्ने उद्देश्यले महासंघले ढोरपाटनमा बैठक आयोजना गरेको थियो ।

बैठकले देशमा लगानीका क्रियाकलापलाई चलायमान गराउन सबै प्रदेशमा लगानी सम्मेलन आयोजना गर्ने निर्णय गरेको अध्यक्ष चन्द्रप्रसाद ढकालले जानकारी दिए । बैठकले सन् २०२५ लाई निजी क्षेत्रले पर्यटन वर्षका रूपमा मानउने निर्णय पनि गरेको छ । अध्यक्ष ढकालको गृहजिल्लामा आयोजना गरिएको सो बैठकले मुलुकमा व्याप्त आर्थिक सङ्कट घटाउँदै तरलता बढाउन असोज मसान्तभित्रै राजनीतिक तथा सरोकारवाला निकायबीच छलफल गर्न उच्चस्तरीय तथा सर्वपक्षीय सम्मेलन गर्ने निर्णय पनि गरेको छ ।

अध्यक्ष ढकालले महासंघ र सरकारले वैदेशिक लगानीका लागि आग्रह गरिरहेको अवस्थामा देशभित्रै लगानीको वातावरण निर्माण गरी आर्थिक चलायमान बनाउनका लागि लगानी सम्मेलन गर्ने निर्णय भएको बताए । उनले ढोरपाटन सिकार आरक्षमा विदेशी पर्यटकहरू सिकार खेल्न मात्रै आउने प्रचलन रहेकाले त्यस क्षेत्रको पर्यटन पूर्वाधार र प्रचारप्रसार गर्न निजी क्षेत्रले उत्सुकता देखाएको बताए ।

बागलुङ उद्योग वाणिज्य संघका अध्यक्ष नरेश कँडेलले देशभरका निजी क्षेत्रका उद्योगी व्यवसायीले ढोरपाटन अवलोकन गर्दा पर्यटनको विकासमा सहयोग पुग्ने बताए । ढोरपाटनमा आवश्यक पर्यटकीय पूर्वाधार, सुविधासम्पन्न होटलसहित अन्य व्यावसायिक योजनासमेत बन्नसक्ने अपेक्षा स्थानीयको रहेको कँडेलले बताए । ढोरपाटन क्षेत्रमा आलु र स्याउको सम्भावना रहेको पनि उनले बताए ।