पठाओको ‘त्रिवि–पठाओ वार्षिक छात्रवृत्ति योजना’

काठमाडौं  । पठाओ नेपालले त्रिभुवन विश्व विद्यालयसँगको सहकार्यमा ‘त्रिवि पठाओ वार्षिक छात्रवृत्ति योजना’ सार्वजनिक गरेको छ ।

सो योजनाका लागि पठाओकी मार्केटिङ हेड सुरक्षा हमाल र त्रिभुवन विश्वविद्यालयका विद्यार्थी कल्याण तथा खेलकुद निर्देशनालयका निर्देशक प्रा. पशुपति अधिकारीले एक सम्झौतापत्रमा हस्ताक्षर गरेका छन् । कम्पनीको सामाजिक उत्तरदायित्व (सीएसआर) अन्तर्गत रहेको यस योजनामा पठाओले आर्थिक समस्या भएका नेपालभरका एक सय जना जेहेनदार विद्यार्थीहरूका लागि एक वर्षमा १५ हजार रुपैयाँसम्मको वार्षिक छात्रवृत्ति प्रदान गरिने जनाएको छ । सम्झौता एक वर्षका लागि गरिएको कम्पनीको भनाइ छ । यस योजनामा विद्यार्थी छनोटका लागि ‘स्कलरसिप कमिटी’ बनाइनेछ । सो कमिटीमा कम्पनीका तर्फबाट दुई जना र विश्वविद्यालयको तर्फबाट तीन जना सदस्य रहनेछन् ।

स्कलरसिपबारे जानकारी र फर्म विश्वविद्यालयले प्रदान गर्ने र पठाओ नेपालको वेबसाइट, सामाजिक सञ्जाल, विश्वविद्यालयअन्तर्गतका कलेजहरू तथा कलेज परिसरभित्र समेत प्रचार गरिने पठाओ नेपालको मार्केटिङ प्रमुख सुरक्षा हमालले जानकारी दिइन् । उनले भनिन्, ‘यस स्कलरसिपका लागि तोकिएको मापदण्डअनुसार आवेदन दिएका उम्मेदवारमध्येबाट उचित उम्मेदवार स्कलरसिप कमिटीले छान्नेछ ।’ यस योजनामा छानिएका विद्यार्थीलाई विश्वविद्यालयअन्तर्गतका मुख्य क्याम्पस र ६२ वटा आङ्गिक क्याम्पसमा छात्रवृत्तिमा पढ्न मिल्ने कम्पनीले जनाएको छ । सामाजिकशास्त्र संकाय, व्यवस्थापन संकाय र शिक्षा संकायमा अध्ययनरत विद्यार्थीहरूलाई स्कलरसिप दिइने कम्पनीको भनाइ छ । कम्पनीले सामाजिक उत्तरदायित्वअन्तर्गत गरेको यो कार्यक्रमको मुख्य उद्देश्य खर्च अभावले जेहेनदार विद्यार्थीको शिक्षा नरोकियोस् भन्ने रहेको हमालले बताइन् ।