नेपालमै पहिलो पटक ‘स्काई रेस पिके पिक प्रतियोगिता’ हुने

सोलुखुम्बु । सोलुखुम्बुको फाप्लुमा नेपालमै पहिलो पटक ‘स्काई रेस पिके पिक ट्रेल रनिङ प्रतियोगिता’ हुने भएको छ । फाप्लुमा बुधबार पत्रकार सम्मेलनको आयोजना गरी कोलम्बिया स्पोर्टस वेयर नेपालको सहयोगमा नेपाल ट्रेल सिरिजले आगामी शुक्रबार प्रतियोगिता गर्ने जानकारी दिईएको हो ।

नेपालमा अन्तर्राष्ट्रियस्तरको स्काई रेस प्रतियोगिता गर्नुको साथै खेलकुद पर्यटन प्रवर्द्धनमा सहयोग गर्ने उद्देश्यले यस रेस गर्न लागिएको रेस व्यवस्थापक प्रिति खत्रीले जानकारी दिइन् । रेसमा ५५ किमीको स्काई अल्ट्रा, ३३ किमीको ट्रेल रेस र ५ किमीको फन रन हुनेछ । करिब २ हजार मिटरको उचाई फाप्लुबाट सुरु हुने रेस लोदिङ हुँदै ४१ सय मिटरको उचाईमा रहेको पिके पार परेर पेमा डाँडा, जुनबेशी, थुक्तेछोलिङ, सिमसरी डाँडा, रिङमु हुँदै फाप्लुमै आएर समापत हुने जनाइएको छ । सोलुदुधकुण्ड नगरपालिका ४ फाप्लुबाट सुरु हुने रेस प्रतियोगितामा करिब ६० जना राष्ट्रिय तथा अन्तर्राष्ट्रिय धावकहरूले सहभागिताका लागि नाम दर्ता गराएको आयोजकले जनाएको छ ।

आयोजकका अनुसार १० देशका २० अन्तर्राष्ट्रिय धावक समेत सहभागि हुनेछन् । भियतनाम, अमेरिका, नेदरल्याण्ड्स, युक्रेन लागयतका धावकको सहभागिता हुने बताईएको छ । प्रतियोगितामा प्रथम द्वितीय र तृतीय हुने महिला र पुरुष धावकहरूले क्रमशः समान ३० हजार, २० हजार र १० हजार नगद प्राप्त गर्नेछन् । उक्त पुरस्कार सोलुदुधकुण्ड नगरपालिकाले प्रायोजक गरेको आयोजक नेपाल ट्रेल सिरिज काठमाडौँले जनाएको छ ।