एनसेलद्वारा छ जनालाई बम्परमा स्कुटर पुरस्कार

काठमाडौं । एनसेल आजियाटा लिमिटेडले ‘हरेक दिन सरप्राइज सबैलाई स्योर–प्राइज’ योजनाअन्तर्गत छ जनालाई बम्पर पुरस्कारमा स्कुटर प्रदान गरेको छ । यस योजनाअन्तर्गत एनसेलले बम्पर पुरस्कारस्वरूप सात जना विजेतालाई स्कुटर उपलब्ध गराउने घोषणा गरेको थियो ।

सो घोषणाअनुसार कम्पनीले छ जनालाई स्कुटर प्रदान गरिसकेको जनाएको छ । कम्पनीका अनुसार मंगलबार र बुधबार विभिन्न सहरहरूमा छुट्टाछुट्टै कार्यक्रमको आयोजना गरि स्कुटर हस्तान्तरण गरिएको हो । कम्पनीले बुधबार काठमाडौंको नयाँ बानेश्वर, भैरहवा र जनकपुरस्थित एनसेल सेन्टरमा तथा मंगलबार विराटनगर, धनगढी र हेटौडामा एक कार्यक्रम आयोजना गरी स्कुटर वितरण गरेको थियो । बुधबार एनसेलका प्रमुख कार्यकारी अधिकृत तथा प्रबन्ध निर्देशक जाब्बोर कायुमोभले नयाँ बानेश्वरमा ललितपुरका आकाश तामाङलाई, एनसेल सेन्टर भैरहवाबाट अभिनेत्री केकी अधिकारीले बाँकेकी मिना त्रिपाठीलाई र अभिनेत्री प्रियंका कार्कीले सप्तरीका सुदीप कुँवर क्षेत्रीलाई बम्पर पुरस्कार प्रदान गरेकी थिइन् ।

यसैगरी, मंगलबार विराटनगरमा अभिनेत्री कार्कीले सुनसरीका रोहन शर्मालाई, धनगढीमा अभिनेत्री अधिकारीले गोमाकुमारी खराललाई र हेटौँडामा एनसेलका प्रोडक्ट डाइरेक्टर विशाल नेगीले चितवनकी रिना ढकाललाई बम्पर पुरस्कार हस्तान्तरण गरेका थिए । यो योजना एनसेलको १८औँ वार्षिकोत्सवको अवसरमा ब्रान्ड प्रतिबद्धता ‘हामी तपाईंकै लागि’अन्तर्गत भदौ ३१ गतेदेखि २८ दिनसम्म सञ्चालनमा रहेको थियो । यस योजनामा प्रत्येक ग्राहकलाई दैनिक स्योर प्राइज प्रदान गरिएको थियो । साथै, एनसेलसम्बन्धी उत्कृष्ट नारा पठाउने एक हजार जनालाई हरेक हप्ता सय रुपैयाँ बोनस ब्यालेन्स प्रदान गरिएको थियो । यस योजनाअन्तर्गत दैनिकरूपमा ग्राहकहरूलाई प्रदान गरिएको स्योर प्राइजहरूमा डिजिटल सेवाहरू, ब्यालेन्स, डाटा, टक टाइम र एसएमएसहरू रहेका थिए ।

साप्ताहिक बोनस ब्यालेन्स र बम्पर पुरस्कारका लागि योग्य हुन ग्राहकहरूले सर्तअनुसार एनसेलको बारेमा नारा पठाउन पठाएका थिए । साप्ताहिक बोनस ब्यालेन्स र बम्पर पुरस्कारका विजेताहरू क्रिएटिभ एजेन्सीमार्फत गरिएको नाराहरूको मूल्यांकन र विजेता छनोट प्रक्रियाको एक अडिट फर्मद्वारा गरिएको परीक्षणको आधारमा छानिएका थिए । यस योजनाअन्तर्गत एनसेलले बम्पर पुरस्कारस्वरूप सात जना विजेतालाई स्कुटर उपलब्ध गराउने घोषणा गरेको थियो ।