जाजरकोटका भूकम्प प्रभावितलाई हुवावेको सहायता

काठमाडौं । हुवावे नेपालले सञ्चार तथा सूचना प्रविधि मन्त्रालय र डिजिटल एम्पावरमेन्ट सोसाइटीसँग मिलेर जाजरकोट र रुकुमका भूकम्प प्रभावितहरूलाई राहत सामग्रीको रूपमा पाल, कम्बल, स्लिपिङ झोलाजस्ता आवश्यक सामग्रीहरू उपलब्ध गराएको छ ।

हुवावे नेपालका सीईओ ह्वाङ जुन, पीआर निर्देशक झाङ लिआङ र डिजिटल एम्पावरमेन्ट सोसाइटीको उपस्थितिमा मन्त्रालयको कार्यालय सिंहदरबारमा मन्त्री रेखा शर्मालाई राहत सामग्री हस्तान्तरण गरिएको हो । हुवावेले यी राहत सामग्रीहरू विपद्बाट प्रभावितहरूलाई तत्काल सहायता र सान्त्वना प्रदान गर्न, उनीहरूको आधारभूत आवश्यकताहरू सम्बोधन गर्न र चुनौतीपूर्ण समयमा केही राहत प्रदान गर्न महत्वपूर्ण हुने बताएको छ । यस्तै, हुवावे नेपालले भूकम्प प्रभावित क्षेत्रमा दूरसञ्चार साइटहरू कायम राख्न २४/७ नेटवर्क सेवा प्रदान गर्न समर्पित रहेको बताएको छ । हुवावेले तुरुन्त भूकम्प प्रभावित क्षेत्रमा दूरसञ्चार सेवालाई निरन्तर सुचारू अवस्थामा राख्न आफ्नो प्राविधिक टिमलाई तयारी अवस्थामा राखेको जनाएको छ ।

हुवावे नेपालका सीईओ ह्वाङ जुनले प्रभावित क्षेत्रमा सञ्चार पूर्वाधारहरू सञ्चालनमा रहन, उद्धार र राहतको समन्वयलाई सहज बनाउन निरन्तर सहयोग गर्ने बताए । हुवावेले यस कठिन समयमा नेपाली जनतासँग ऐक्यबद्धतामा उभिएको र पुनः निर्माणको लागि सहयोग प्रदान गर्न प्रतिबद्ध रहेको स्पष्ट गरेको उनले बताए ।