नेपालमा व्यवसाय अनुकूलनसम्बन्धी प्रतिवेदन सार्वजनिक

काठमाडौं । नेपाल उद्योग परिसंघ (सीएनआई) र पीडब्लूसी (प्राइज वाटर हाउस कोपर्स) भारतले संयुक्तरूपमा तयार पारेको जलवायु परिवर्तनको प्रभाव र नेपालमा व्यवसाय अनुकूलनसम्बन्धी प्रतिवेदन सार्वजनिक गरिएको छ । सीएनआई र पीडब्लुसीले तयार पारेको अध्ययन प्रतिवेदन प्रधानमन्त्री पुष्पकमल दाहाललाई हस्तान्तरण गरी सार्वजनिक गरिएको हो ।

नेपालको अर्थतन्त्र र व्यवसायमा जलवायु परिवर्तनको प्रभाव सम्बोधन गर्ने नेपालको प्रयास र निजी क्षेत्रको पहलका रूपमा यसलाई महत्वपूर्ण मानिएको छ । अध्ययन प्रतिवेदनमा जलवायु परिवर्तनका कारण नेपालका ठूला तथा साना उद्योगहरूले सामना गर्ने जोखिम तथा समाधानका उपायहरू सुझाइएको छ । यसले व्यवसायलाई जलवायु परिवर्तनसँग अनुकूलन गर्न सहज वातावरण बनाउन, जोखिम न्यूनीकरण रणनीति अबलम्बन गर्न, मूल्य शृङ्खला एवम् जलवायु अनुकूलनबाट उत्पन्न हुने अवसरहरू कसरी पुँजीकरण गर्न सकिन्छ भन्ने विषय प्रतिवेदनमा समेटिएका छन् । विश्वव्यापी जलवायु परिवर्तन र यसबाट नेपालले भोगेको असरका विषयमा नेपालले अन्तर्राष्ट्रिय मञ्चमा प्रभावकारी ढंगले उठाउँदै आएको सन्दर्भमा निजी क्षेत्रले समेत यसलाई उच्च प्राथमिकता दिएको छ । जलवायु परिवर्तनबाट सिर्जित चुनौतीको सामना गर्न सरकार, नागरिक समाज, व्यावसायिक क्षेत्रबीचको सहकार्य महत्वपूर्ण छ ।

परिसंघका अध्यक्ष राजेशकुमार अग्रवालले प्रतिवेदनले नेपाली व्यवसायीको लागि रोडम्याप तयार गर्न ठोस कदमहरू र योजनाहरूको रूपरेखा प्रस्तुत गरेको बताए । यसमा जोखिम न्यूनीकरण रणनीतिको रूपमा अनुकूलनलाई पछ्याउने र राष्ट्रिय जलवायु अनुकूलन प्रयासहरूलाई समर्थन गर्ने सरकार, बहुपक्षीय÷द्विपक्षीय एजेन्सीहरूजस्ता विभिन्न सरोकारवालाको भूमिकाका विषय समेत समेटिएका छन् । पीडब्ल्यूसी इन्डियाका प्रबन्ध निर्देशक जयवीर सिंहले जलवायु अनुकूलन व्यवसायका लागि एक जिम्मेवारी मात्र नभएर रणनीतिको आवश्यकता रहेको बताए । जलवायु परिवर्तन र यसको असरले बढ्ने लागत तथा अन्य जोखिमसहित यस परिवर्तनशील परिदृश्यलाई अनुकूलन गर्न सक्रिय भई व्यवसायीहरूलाई प्रोत्साहन गर्नुपर्नेमा उनले जोड दिए ।

प्रतिवेदन नेपाल सरकार, सरोकारवाला सबैलाई महत्वपूर्ण दस्तावेज हुने विश्वास गरिएको छ । साथै यसले व्यावसायिक सुरक्षा मात्र नभएर राष्ट्रको समग्र आर्थिक स्थिरतामा पनि योगदान पु¥याउने दुवै संस्थाको विश्वास छ । यो प्रतिवेदनले नेपाललाई जलवायु परिवर्तन अनुकूलनलाई बुझ्न र सम्बोधन गर्नका लागि महत्वपूर्ण मार्गनिर्देशन प्रदान गर्ने बताइएको छ । यो रिपोर्ट व्यवसाय, नीतिनिर्माताहरू र संस्थाका लागि जलवायु परिवर्तन अनुकूलन गर्न महत्वपूर्ण स्रोत हुने विश्वास गरिएको छ ।