टेलिकमको नयाँ सिममा एक जीबी डाटा नि:शुल्क

काठमाडौं । नेपाल टेलिकमको नयाँ प्रिपेड सिमकार्ड लिएर चलाउँदा उपलब्ध हुने विभिन्न निःशुल्क सुविधा थप हुने भएको छ । कम्पनीले नयाँ सिम लिनेहरूलाई एक जीबी डाटा निःशुल्क उपलब्ध गराउन लागेको हो । यस्तै, टेलिकमकै नेटवर्कमा १०० मिनेट भ्वाइस कल गर्न र १०० वटा एसएमएस पठाउन सकिने सुविधा पनि थप गरिएको कम्पनीले जनाएको छ ।

कम्पनीले यसअघि ९० रुपैयाँमा उपलब्ध हुने नयाँ प्रिपेड सिमकार्डमार्फत ३०० एमबी डाटा चलाउन, ४० मिनेट कल गर्न र २० वटा एसएमएस पठाउन सकिने सुविधा उपलब्ध गराएको थियो । सोही सिममा अबदेखि कम्पनीले नयाँ सुविद्या उपलब्ध गराउने भएको हो । यी सबै सुविधा ३० दिनसम्म प्रयोग गर्न सकिने छ । पहिलेजस्तै यसमा १० रुपैयाँ ब्यालेन्स समेत उपलब्ध हुनेछ ।

यस्तै, कम्पनीले कक्षा ८ देखि माथिका सबै विद्यार्थीलाई सिम उपलब्ध गराउने जनाएको छ । कक्षा ८, ९ र १० का विद्यार्थीलाई समेत उनीहरूको अभिभावकको नागरिकता र सम्बन्धित विद्यालयद्वारा जारी गरिएको परिचय पत्रको आधारमा ९० रुपैयाँमा प्रिपेड सिमकार्ड उपलब्ध गराउने बताइएको छ ।