काठमाडौं–मस्कोबीच हवाई सम्पर्क स्थापित गर्न जोड

काठमाडौं । नेपाल चेम्बर अफ कमर्सका पदाधिकारी र नेपाल भ्रमणमा रहेको रुसी महासंघको व्यावसायिक प्रतिनिधिहरूले काठमाडौं–मस्कोबीच सिधा हवाई सम्पर्क स्थापित गर्न पहल गर्नुपर्नेमा जोड दिएका छन् । दुई संस्थाका प्रतिनिधिहरूबीच भएको भेटवार्तामा उनीहरूले दुई मुलुकबीच संयुक्त लगानी एवम् व्यापारिक साझेदारी तथा हवाई उडानका बारेमा छलफल गरेका छन् ।

रुसी महासंघको प्रतिनिधि मण्डलसँग चेम्बरका अध्यक्ष राजेन्द्र मल्लले काठमाडौं र मस्कोबीच सिधा हवाई सम्पर्क स्थापित गर्नका लागि संयुक्त पहल गर्नुपर्नेमा जोड दिए । ‘नेपाल रुसबीचको कूटनीतिक सम्बन्ध बलियो छ, सयौँ नेपाली विद्यार्थीहरू इन्जिनियरिङ, चिकित्सालगायतका विषय अध्ययनका लागि जाने गरेका छन्’, उनले भने, ‘रुसका तर्फबाट पनि वार्षिक १० हजारको हाराहारीमा नागरिकहरू नेपाल घुम्न आउने गरेको सन्दर्भमा सिधा हवाई सम्पर्क सञ्जाल बढाउन सकियो भने दुवै मुलुकलाई फाइदा पुग्छ ।’

नेपालमा काठमाडौंसँगै पोखरा अन्तर्राष्ट्रिय विमानस्थल र भैरहवा अन्तर्राष्ट्रिय विमानस्थल पनि सञ्चालनका क्रममा रहेकाले दुई मुलुकबीच सिधा हवाई सम्पर्क सञ्जाल विस्तार गरेर आर्थिक सहकार्य र व्यापारिक साझेदारी गर्नुपर्नेमा अध्यक्ष मल्लले जोड दिए ।

नेपालको कृषि, पर्यटन, उद्योग, एवम् आईटी क्षेत्रमा लगानीको उच्च सम्भावना रहेको उल्लेख गर्दै अध्यक्ष मल्लले रुसी लगानीको प्रतिफल सुनिश्चत गर्नका लागि चेम्बर पहल गर्ने समेत बताए । चेम्बर पदाधिकारीहरूसँगको भेटमा रुसी महासंघको व्यावसायिक प्रतिनिधि मण्डलले पनि नेपालमा सिधा हवाई सम्पर्क सञ्जाल विस्तारका लागि आफूहरूले पहल गर्ने बताएका थिए । हवाई सम्पर्क स्थापित गर्नका लागि दुवै देशका सरकारसमक्ष संयुक्त पहल गर्नुपर्ने रुसी महासंघका प्रमुख एलेक्जेण्डर एल रेवासले बताए । दुई मुलुकबीच अन्य व्यापारिक क्षेत्रमा पनि सहकार्य गर्न सकिने उनको भनाइ छ । चेम्बर पदाधिकारीसँगको भेटवार्तामा रुसी महासंघको टोलीले नेपालमा उत्पादन हुने चिया र यसको विश्वबजारबारे चासो राखेका थिए ।