नाडाको अध्यक्षमा करण चौधरी चयन हुँदै

काठमाडौं । नेपाली अटोमोबाइल व्यवसायीहरूको छाता संस्था ‘नाडा अटोमोबाइल एसोसिएसन नेपाल’को आगामी पुस २० र २१ मा हुने ४७औँ वार्षिक साधारणसभाले नयाँ नेतृत्व चयन गर्दै छ । अध्यक्षका आकांक्षी करण चौधरी र आकाश गोल्छाबीच सहमति भएपछि नाडाको आगामी नेतृत्वमा करण चौधरी सर्वसम्मत चयन हुने भएका हुन् ।

आकाश गोल्छालाई अर्को कार्यकालमा सर्वसम्मत अध्यक्ष बनाउने सर्त भएपछि यस कार्यकालमा चौधरीको नाम सिफारिस भएको हो । नाडाको आगामी नेतृत्वका लागि सुरुमा चौधरी, गोल्छासहित राजनबाबु श्रेष्ठ पनि आकांक्षी थिए । सिप्रदीका सिइओ श्रेष्ठले चौधरीलाई अध्यक्षमा समर्थन गर्दै ‘ब्याक’ भएपछि चौधरी र गोल्छाबीच चुनावी प्रतिस्पर्धा हुने देखिएको थियो । तर, अहिलेको गम्भीर संकटका बेलामा व्यवसायीहरू एकीकृत भएर अगाडि बढ्नुपर्ने महसुस गरेर सर्वसम्मत अध्यक्ष चयन गर्न खोजिएको नाडा अध्यक्ष ध्रुव थापाले बताए ।

चौधरी सिजी अटोमोबाइल्सका प्रबन्ध निर्देशक हुन्, जसले मारुती सुजुकी गाडी बिक्री–वितरण गर्दै आइरहेको छ । गोल्छाले फोर्ड ब्रान्डको गाडी बिक्री गर्दै आइरहेका छन् । त्यस्तै, नेपाल उद्योग वाणिज्य महासंघ र नेपाल उद्योग परिसंघमा जस्तै नाडामा पनि वरिष्ठ उपाध्यक्ष अर्को कार्यकालमा स्वत:अध्यक्ष हुने व्यवस्था गर्ने सहमति भएको छ ।