भूकम्पपीडितलाई खाद्यान्न तथा लत्ताकपडा सहयोग

काठमाडौं । मानवसेवा आश्रमको सहजीकरणमा आनी छोइङ डोल्मा फाउन्डेसनले भूकम्पपीडितलाई २० लाख रुपैयाँ बराबरका खाद्यान्न तथा लत्ताकपडा सहयोग गरेको छ । गत कात्तिक १७ जाजरकोट केन्द्रविन्दु भएर गएको भूकम्पबाट घरबारविहीन भएका पीडितलाई बुधबार फाउन्डेसनले खाद्यान्न तथा लत्ताकपडा वितरण गरेको हो ।

भूकम्प प्रभावित दुई सय ५० घरधुरीलाई प्रतिपरिवार एक बोरा चामल, पाँच किलो दाल, दुई किलो सोयाबिन, दुई किलो नुन र दुई लिटर तेलसहित न्यानो ब्ल्याङ्केट वितरण गरिएको छ । त्यस्तै, चार सय बालबालिकालाई न्यानो कपडासहित जुत्ता वितरण गरिएको छ ।

भौगोलिक विकटताका कारण भूकम्प गएको दुई महिना बितिसक्न लाग्दा समेत जाजरकोटको ध्यार गाउँमा कुनै पनि सरकारी तथा गैरसरकारीतर्फबाट राहत प्राप्त हुन नसकेको अवस्थामा उक्त सहयोगले कष्टपूर्ण जीवन बिताइरहेका भूकम्पपीडितलाई राहत पुग्ने आनी छोइङ डोल्मा फाउन्डेसनका अध्यक्ष आनी छोइङ डोल्माले बताइन् । आनी छोइङ, मानवसेवा आश्रमका केन्द्रीय अध्यक्ष रामजी अधिकारी, आश्रमका कोषाध्यक्ष होमनाथ तिमल्सिना, कर्णाली प्रदेश संयोजक सञ्जिता गौतमलगायतको टोलीले राहत वितरण गरेका थिए ।