‘आइएमई पे’ कन्दरा सांगीतिक ब्यान्ड कन्सर्टको पार्टनर

काठमाडौं । डिजिटल वालेट ‘आइएमई पे’ कन्दरा साङ्गीतिक ब्यान्ड कन्सर्टको टिकेटिङ पार्टनरको रूपमा रहने भएको छ । कन्दरा साङ्गीतिक ब्यान्डले नेपाल सरकारको आन्तरिक पर्यटकीय अभियान ‘पहिला घरदेश, अनि परदेश’ आन्तरिक पर्यटनको प्रवर्द्धन सन्देश लिई नेपालमा आठ स्थानमा कन्सर्टको आयोजना गर्न लागेको छ ।

“हङ्गकङ्ग पोखरा”, “तगारोमा रूमाल”, “लेककी हे माया”, “तिमी पारी”, “डाँडापारी” आदि कालजयी गीतहरू प्रस्तुत गरी नेपाली फोक–पप सङ्गीतमा आफ्नो अमिट छाप छोडेको कन्दरा ब्यान्डले यही पौष २७ गते पोखराको पोखरा प्रदर्शनी केन्द्रबाट आफ्नो प्रत्यक्ष साङ्गीतिक कार्यक्रम सुरू गर्न लागेको हो । पहिलो कार्यक्रम पोखराबाट सुरू गरी अन्तिम कार्यक्रम काठमाडौंमा समापन गर्ने लक्ष्य रहेको कन्दरा ब्यान्डको व्यवस्थापन कम्पनी एल्फा स्क्वायरले जनाएको छ ।

पोखरा पर्यटन परिषद्को आयोजनामा पोखरामा हुन लागेको कार्यक्रममा गण्डकी प्रदेश सरकारका मुख्यमन्त्री तथा मन्त्रिपरिषद्को कार्यालय, उद्योग, पर्यटन, वन तथा वातावरण मन्त्रालय, नेपाल पर्यटन बोर्ड, पोखरा महानगरपालिका, पोखरा प्रज्ञा–प्रतिष्ठान, लाइन्स क्लब अफ पोखरा– सामीप्य आदि सङ्घ–संस्थाले प्रवद्र्धन गरिरहेका छन् भने सो कन्सर्टको एकमात्र एक्सक्लुसिभ टिकेटिङ पार्टनररूपमा आइएमई–पे रहेको छ । यसले आफ्नो आधिकारिक मोबाइल एपबाट टिकट बिक्री गर्ने छ ।