पहिलो निजी टेलिकम कम्पनी यूटीएल समाप्त

काठमाडौं । नेपालको पहिलो निजी टेलिकम कम्पनी युनाइटेड टेलिकम लिमिटेड (यूटीएल) अब सधैँका लागि समाप्त भएको छ । सरकारले लाइसेन्स खारेज र बाँकी बक्यौता उठाउने निर्णय गरेपछि उक्त निर्णयविरुद्ध यूटीएल २०७६ साल वैशाख २७ गते सर्वोच्च अदालतमा रिट लिएर गएको थियो ।

यूटीएलले सरकारविरुद्ध हालेका सबै मुद्दा सर्वोच्च अदालतले मंगलबार खारेज गरिदएपछि उक्त कम्पनी अब सधैँका लागि समाप्त भएको हो । सर्वोच्चका न्यायाधीशद्वय प्रकाशकमान सिंह राउत र अब्दुल अजिज मुसलमानको संयुक्त इजलासले यूटीएलले दायर गरेको मुद्दा खारेज गरिदिएका हुन् । यूटीएलसँग सम्बन्धित एकै प्रकृतिको ५ वटा मुद्दाको मंगलबार एकैदिन सुनुवाइ भएको थियो ।

मुद्दा खारेजसँगै यूटीएलले करिब साढे पाँच अर्ब रुपैयाँ तिर्नुपर्नेछ भने यूटीएलविरुद्ध नेपाल दूरसञ्चार प्राधिकरणले हालेको मुद्दामा सर्वोच्चले प्राधिकरणको मागदाबीमा कानुनबमोजिम गर्न आदेश दिएको छ । ‘सर्वोच्चको मंगलबारको फैसलासँगै अब यूटीएलको लाइसेन्स सधैँका लागि खारेज भएको छ भने सरकारलाई तिर्नुपर्ने, लाइन्सेन्स नवीकरणको बाँकी बक्यौतासहितको सबै शुल्क तिर्नुपर्ने भएको छ । कम्पनीले इजाजत पत्र नवीकरणबापतको किस्ता, फ्रिक्वेन्सी शुल्क र रोयल्टीबापतको रकम पनि तिरेको छैन’, प्राधिकरणका एक अधिकारीले भने ।

सरकारले यूटीएललाई लिमिटेड मोबिलिटी, अनुमति दस्तुर, आवश्यक उपकरण खरिदसहित लाइसेन्स फि किस्ताबन्दीमा तिर्न, १८ करोड ९४ लाख रुपैयाँ रोयल्टी नै छुट दिनेसहितको सुविधा दिँदा पनि यूटीएलले आफ्नो अधिकारको दुरुपयोग गरेको कारण यूटीएलको लाइसेन्स खारेज गरिएको थियो ।