एसपावर क्यान इन्फोटेक आजदेखि

काठमाडौं । कम्प्युटर एसोसिएसन नेपाल महासंघ (क्यान महासंघ)को आयोजनामा आज (बिहीबार)देखि सोमबारसम्म राजधानीमा २९औँ संस्करणको ‘क्यान इन्फोटेक २०२४’ हुने भएको छ ।

महासंघले हरेक वर्ष क्यान इन्फोटेक आयोजना गर्दै आएको छ । २९औँ क्यान इन्फोटेकको मुख्य प्रायोजकमा एस पावर बीपीई प्राइभेट लिमिटेड र सह–प्रायोजकमा एचएमसी दहुआ रहेको छ । प्रायोजनका आधारमा यस प्रदर्शनीको नाम ‘एस पावर क्यान इन्फोटेक २०२४ इन एसोसिएसन विथ एचएमसी दहुवा रहेको छ । यस संस्करणको इन्फोटेक मेलालाई करिब साढे तीन लाखले अवलोकन गर्ने महासंघको अपेक्षा छ । क्यान महासंघका अध्यक्ष रणजीत पोदारले प्रदर्शनीमा राखिने नवीनतम प्रविधि तथा स्थानीय बजारको मागअनुसार विकास गरिएका प्रतिभा र आविष्कारले डिजिटल नेपाल निर्माणको अभियानलाई सहयोग पुग्ने बताए ।

यस्तै, महासंघका महासचिव चिरञ्जीवी अधिकारीले क्यान इन्फोटेकमा स्टार्टअप, युवा प्रतिभा, नवप्रवर्तन तथा नेपाली उत्पादनलाई विशेष प्राथमिकता दिइएको जानकारी दिए । इ–सेवामार्फत इन्फोटेकको टिकट खरिद गर्न सकिनेछ । सर्वसाधारणका लागि एक सय र विद्यार्थीका लागि ५० रुपैयाँ शुल्क तोकिएको छ । जेष्ठ नगरिक, फरक क्षमताका नागरिक, १० वर्ष मुनिका बालबालिका तथा सरकारी र सामुदायिक विद्यालयको सिफारिसमा सामूहिक अवलोकनका लागि निःशुल्क प्रवेश व्यवस्था महासंघले जनाएको छ ।

यस्तै, महासंघले लर्ड बुद्ध एजुकेसन फाउन्डेसनसँगको सहकार्यमा प्रदान गर्दै आएको छात्रवृत्ति प्रदान पनि घोषणा गर्ने जनाएको छ । बीएस्सी आईटी डिग्रीका लागि महासंघले प्रत्येक वर्ष दुई करोडको छात्रवृत्ति प्रदान गर्दै आएको छ । त्यस्तै, नेपाल रोबोटिक्स एकेडेमीले क्यान महासंघसँगको सहकार्यमा नेपालमै विकास गरिएको जेनेरेटिभ एआई सिस्टम ‘कान्छी’ रोबटको बेटा संस्करण सार्वजनिक गरिने भएको छ । यस्तै, एनपी सर्ट र सीएसआरआईको पहलमा साइबर सेक्युरिटी हेल्प डेस्क समेत सञ्चालन हुनेछ ।

प्रदर्शनीमा अवलोकनकर्ताले एकै थलोमा सूचना तथा सञ्चार प्रविधिका नौला र भविष्यका निम्ति प्रविधिहरू र उपकरणको अवलोकन तथा खरिद गर्न पाउनेछन् ।