ग्रिलग्राम सञ्चालन गर्नुपर्नेमा जोड

काठमाडौं । ग्रिल तथा स्टिल व्यवसायीहरूलाई व्यवस्थित ढंगबाट र सहरी सौन्दर्यतालाई कायम गर्न सरकारले ग्रिलग्रामको व्यवस्था गर्नुपर्नेमा सरोकारवालाहरूले जोड दिएका छन् ।

ग्रिल तथा स्टिल व्यवसायी महासंघ र नेपाल घरेलु तथा साना उद्योग महासंघका प्रतिनिधिका बीचमा भएको छलफलमा उनीहरूले यस्तो बताएका हुन् । घरेलु तथा साना उद्योग महासंघका अध्यक्ष उमेशप्रसाद सिंहले लघु घरेलु तथा साना उद्योगहरूको उत्पादकत्व र क्षमता बढाउन सकेमात्रै अर्थतन्त्रलाई समृद्धिको बाटोमा अगाडि बढाउन सकिने बताए । यस्ता उद्योगहरूको प्रवर्द्धन गर्न जरुरी रहेको उनको भनाइ थियो । यी उद्योगहरूको उत्पादकत्व र क्षमता बढाउन आगामी दिनमा दुई संस्थाबीच सहकार्य गरिने पनि अध्यक्ष सिंहले बताए ।

ग्रिल तथा स्टिल व्यवसायी महासंघका अध्यक्ष ठूलोबाबु श्रेष्ठले सरकारी निकायहरूमा उद्योग दर्ता र नवीकरण प्रक्रिया झन्झटिलो भएको हुँदा सरल तरिकाबाट उद्योग दर्ता र नवीकरण गर्न सम्बन्धित निकायमा आवश्यक पहल गरिदिन आग्रह गरे । कोरोना एवम् आर्थिक मन्दीको कारणबाट व्यवसायीहरूमा परेको आर्थिक समस्याको समाधानार्थ बैंकको उच्च ब्याजदरलाई न्यूनीकरण गर्न र विनाधितो सहुलियत दरको कर्जाको निमित्त सम्बन्धित निकायमा आवश्यक पहल गर्न पनि उनले आग्रह गरे । ग्रिल तथा स्टिल व्यवसायीहरूले आयात गर्ने ठूला एवम् साना मेसिन औजारहरूमा सरल तरिकाबाट न्यूनतम भन्सार शुल्कमा आयात गर्न पाउनुपर्ने उनको माग छ । यो क्षेत्रमा दक्ष र अर्धदक्ष गरी एक लाख ६० हजार मजदुरहरू कार्यरत रहेको उनले बताए । छलफलमा ग्रिल तथा स्टिल व्यवसायी महासंघ नेपालका वरिष्ठ उपाध्यक्ष अमृतबहादुर श्रेष्ठ, प्रथम उपाध्यक्ष केदार अधिकारी, महासचिव विवेकदास श्रेष्ठलगायतको उपस्थिति रहेको थियो ।