इ–प्लुटो सेभेन जी विद्युतीय स्कुटर नेपालमा

काठमाडौं ।
इन्डियन विद्युतीय गाडी कम्पनी पियोर इभले आफ्नो नयाँ मोडल इ–प्लुटो सेभेन जी स्कुटर नेपाली बजारमा ल्याएको छ । इन्डियन इन्स्टिच्युट अफ टेक्नोलोजी हैदराबादस्थित यस विद्युतीय गाडी उत्पादक कम्पनी भारतीय बजारमा अग्रणी स्थानमा पर्दछ । इन्टरनेशनल सेन्टर अफ अटोमोटिभ टेक्नोलोजी (आईक्याट) बाट मान्यता प्राप्त पियोर इभले आउँदो सन् २०२२ सम्म नेपालको करिब १० प्रतिशत बजार ओगट्ने विश्वास गरेको छ ।

पियोर इभको इ–प्लुटो सेभेन जी मोडलको अधिकतम गति ६० केएमपीएच रहेकोे छ । साथै यसमा २.५ केडब्लुएच क्षमता भएको पोर्टेबल लिथियम आयन ब्याट्री रहेकोे छ जसले एक पटकको चार्जमा १०० केएमसम्म को यात्रा गर्न सकिन्छ भने यसको ब्याट्रीमा ४० हजार किमिसम्म वारेन्टी रहेको छ ।

पियोर इभकाका सीईओ रोहित भादेराले ह्वाइट लोटस मोटर्स, नेपालसँग सहकार्य गरी आफ्नो विद्युतीय गाडीहरु नेपाली उपभोक्ताहरुमाझ उपलब्ध गर्न पाउनु कम्पनीको महत्वपूर्ण उपलब्धि भएको बताए । आगामी दिनहरुमा आफ्नो नयाँ मोडलहरु नेपाली बजारमा ल्याउने उनले बताए । यसका साथै आगामी दिनमा साउथ एसिया, साउथ इस्ट एसिया र इस्ट अफ्रिकाका देशहरुमा पनि बजार विस्तारित गर्ने उनले बताए ।

उनले नेपालमा वार्षिक करिब १ हजार स्कुटर बिक्रीको लक्ष्य रहेको र नेपालको अरु पाँच सहरहरुबाट पनि आफ्नो विद्युतीय स्कुटर उपलब्ध हुने जानकारी दिए । इ–प्लुटो सेभेन जीकोको ब्याट्री र डिजाइन नेपाली बाटो सुहाउँदो रहेको बताइएको छ । कम्पनीको अनुसार इलेक्ट्रिकल्स स्कुटरहरुको बजार विस्तार आक्रामक रहनुको साथै सर्भिस स्टेशन तथा स्पेयर पाट्र्सको पनि सहज व्यवस्था गरिनेछ ।

ह्वाइट लोटस मोटर्स, नेपालका कार्यकारी अध्यक्ष अशोक खड्गीले पियोर इभसँगको सहकार्यमा वल्र्ड क्लास इलेक्ट्रिक टु ह्विलर नेपालको बाटो सुहाउँदो र नेपाली उपभोक्ताको रोजाइअनुसार रहेको बताए । आफ्नो उपभोक्तालाई हाई क्वालिटी वर्कशप र आफ्टर सेल्स सर्भिस पनि उपलब्ध गराइने उनले बताए ।