महामारीमा पनि दराज ११.११ को बिक्रीले कीर्तिमान बनायो

काठमाडौं ।
नेपालको सबैभन्दा ठूलो अनलाइन बजार दराजले कोभिड १९ को बाबजुद पनि ११.११ का सबै पछिल्ला रेकर्डहरू तोड्न सफल भएको छ । ११.११ सुरू भएको पहिलो घण्टभित्र दराजले दुई करोड २२ लाख रुपैयाँको बिक्री दर्ता गरेको थियो, जुन गत वर्षभन्दा ६० प्रतिशत बढी हो । कम्पनीका अनुसार यस अभियानको दौरान दराजमा पाँच लाखभन्दा बढी प्रयोगकर्ताहरूको उपस्थिति थियो । सात हजारभन्दा बढी बिक्रेताहरूले २८ विभिन्न सहरहरूमा व्यापार गर्न सफल भएको कम्पनीले जनाएको छ । वालेट र कार्डमार्फत गरिने अनलाइन पेमेन्टमा पनि गत वर्षभन्दा उल्लेखनीय बढी वृद्धि देखिएको कम्पनीको भनाइ छ, जुन पूरै सेलको ४५ प्रतिशत थियो ।

कम्पनीका अनुसार यस वर्षको ११.११ मा गत वर्षभन्दा तुलनात्मक रुपले बढी संख्यामा बिक्री भएको छ । अभियानको उल्लेखनीय हाइलाइटहरूमध्ये, पोको सी वान र एम २ फोन अभियान सुरु भएको पहिलो घण्टाभित्रै बिक्री भइसकेको थियो । बजारमा महामारीको कारण कम व्यापार भइरहेको बेला ११.११ धेरै व्यवसायहरूको लागि सफलताको वरदान साबित भएको कम्पनीको दाबी छ ।

विशेष गरी साना र मझौला आकारका उद्यमहरूको लागि (एसएमई) ११.११ मा भएको कुल व्यापार संख्यामा २० प्रतिशत जति एसएमईहरूद्वारा उत्पन्न भएको थियो । यी एसएमईहरु दराजको सहयात्री कार्यक्रमद्वारा दराजमा दर्ता भएका थिए । उक्त कार्यक्रम विशेषगरी महामारीको बखत एसएमईहरुलाई सहयोग गर्न दराजले लिएर आएको थियो ।

मुलुकको चुनौतीपूर्ण अवस्थाको बाबजुद पनि नेपालमा सफलतापूर्वक ११.११ तेस्रो पटक आयोजना गरी उपभोक्ता र बिक्रेता दुवैको लागि केही सकारात्मक चिज ल्याउन सफल भएको दराज नेपालका प्रबन्धनिर्देशक लिनो अलरिंगले बताए । उनका अनुुसार यस वर्षको ११.११ मा गत दुई वर्षभन्दा अझ बढी प्रयोगकर्ताहरू, बिक्रेताहरू, खरिददारहरू थिए । साथै सबैभन्दा पहिलो डेलिभरी ११.११ कै दिन ८ बजे भएको थियो । ग्राहकहरूले उनीहरूको अर्डर समयमै पु¥याउनका लागि कम्पनीले सात सय थप डेलिभरीकर्मीहरू थपेको थियो ।