शैलुङमा साइन्स पार्क निर्माण हुने

दोलखा ।
दोलखाको शैलुङ गाउँपालिकामा शैलुङ साइन्स पार्क निर्माण हुने भएको छ । शैलुङ गाउँपालिकाका स्थानीय बुद्धिजीवीहरु तथा शैलुङ गाउँपालिकाको पहलमा शैलुङ गाउँपालिका–८, शैलुङ्गेश्वरको पोखरीडाँडामा शैलुङ साइन्स पार्क निर्माण हुने भएको हो ।

नेपाल विज्ञान तथा प्रविधि प्रज्ञा–प्रतिष्ठान (नास्ट)ले शैलुङ गाउँपालिकाको विभिन्न तीन स्थानमा अध्ययन गरी बुझाएको प्रतिवेदनमा पोखरीडाँडामा शैलुङ साइन्स पार्क फिजिबल रहेको उल्लेख छ । नास्टका प्रविधि संकाय प्रमुख डा. रवीन्द्रप्रसाद ढकाल नेतृत्वको टोलीले गत माघ ९ र १० मा शैलुङ गाउँपालिकाको विभिन्न स्थानमा गरेको स्थलगत अध्ययन गरेपछि शैलुङ साइन्स पार्क निर्माणको प्रक्रिया अघि बढेको हो ।

विभिन्न क्षेत्रका अनुसन्धानकर्ता, विज्ञहरु र नास्टको टोलीले शैलुङ गाउँपालिकाको पोखरीडाँडा, फलामपोखरी र राँकेडाँडामा दुई दिनसम्म स्थलगत अध्ययन गरेको शैलुङ साइन्स पार्कका अभियन्ता शोभित उप्रेतीले जानकारी दिए । नास्टले शैलुङ गाउँपालिका–८, शैलुङ्गेश्वरको पोखरीडाँडामा शैलुङ साइन्स पार्क निर्माण प्रक्रिया अघि बढाएको उप्रेतीले जानकारी दिए । जग्गा प्राप्तिपछि आगामी आर्थिक वर्षबाट काम सुरु गरेर चार वर्षमा निर्माण गरिसक्ने नास्टको योजना छ ।

शैलुङ साइन्स पार्क स्थापनापछि अनुसन्धान र विकासको कामलाई बढावा दिने, वैज्ञानिक ज्ञान तथा प्रविधिको प्रवाह गरिने र स्थानीय प्रविधि र परम्पराको संरक्षणमा सहज हुने बताइएको छ । शैलुङ साइन्स पार्कमा अन्तरिक्ष टेक्नोलोजी मोडेल, जैविक उद्यान, जलवायु नवीनता केन्द्र, नवीकरणीय ऊर्जा मोडेल, विद्यालय तथा कलेजस्तरका विज्ञान मोडेल र प्रयोगशालाहरू, स्थानीय आविष्कारहरूको प्रदर्शन, चिकित्सा र स्वास्थ्य प्रविधि, स्थानीय वास्तुकला तथा इन्जिनियरिङ संरचना हुने नास्टको प्रतिवेदनमा उल्लेख छ । पार्कमा अडिटोरियम, सडकहरू, पैदलमार्गहरू, विज्ञान, प्रविधि र संग्रहालय, प्रयोगात्मकस्थल र सहयोग केन्द्र, पिकनिट स्पटलगायतका संरचनाहरु पनि बन्ने बताइएको छ ।