महासंघको २२औं साधारणसभा

काठमाडौँ ।
नेपाल निर्माण व्यवसायी महासंघको २२औँ साधारणसभा काठमाडौँस्थित नेपाल प्रज्ञा प्रतिष्ठान कमलादीमा आइतबारबाट सुरु हुने भएको छ । देशभरका एक हजारभन्दा बढी व्यवसायीहरूको सहभागिता रहने साधारणसभाको बन्दसत्र भने सोमबार सोही स्थानमा हुने भएको छ ।

महासंघका अनुसार साधारणसभाको उद्घाटन भौतिक पूर्वाधार तथा यातायातमन्त्री वसन्तकुमार नेम्वाङबाट हुनेछ । कोभिड–१९ को सङ्क्रमणका बीच निर्माण उद्योग थप समस्याग्रस्त भएकाले योसहित अन्य समसामयिक विषयमा छलफल भई साधारणसभाको अन्त्यमा महासंघको काठमाडौं घोषणापत्र जारी गरिने महासंघका महासचिव रोशन दाहालले बताए । दाहालका अनुसार साधारणसभा सम्पन्न गर्नका लागि महासंघका अध्यक्ष रवि सिंहको संयोजकत्वमा मूल आयोजक समिति गठन गरिएको छ ।

साधारणसभाको उद्घाटन सत्रमा भौतिक पूर्वाधार तथा यातायातमन्त्री नेम्वाङबाट निर्माण क्षेत्रमा केन्द्रित रही विज्ञहरुको लेख रचना समेटिएको महासंघको मुखपत्र नेपाली निर्माण विशेषाङ्कको विमोचन गरिनेछ । सोही अवसरमा निर्माण उद्योगमा विभिन्न क्षेत्रबाट योगदान दिनेहरूलाई सम्मान समेत गरिनेछ । कार्यक्रमस्थलमा निर्माण उपकरणसहित समग्र निर्माण उद्योग र प्रविधिसँग सम्बन्धित ३० वटा प्रदर्शनी कक्षहरु पनि राखिने महासचिव दाहालले जानकारी गराए ।