डिशहोम एफसी चितवनको प्रायोजक

काठमाडौं ।
नेपालमा पहिलोपटक आयोजना हुनलागेको फ्रेन्चाइज फुटबल प्रतियोगिता नेपाल सुपर लिगमा सहभागी टिम एफसी चितवनलाई डिशहोमले प्रायोजन गरेको छ ।डिसहोमका प्रबन्ध निर्देशक सुदिप आचार्य र एफसी चितवनका अध्यक्ष सचिन ढकालले डिशहोमद्वारा एफसी चितवनलाई प्रायोजन गर्ने सम्झौतापत्रमा हस्ताक्षर गरेका छन् ।

भरत खवास मार्की प्लेयर रहेका एफसी चितवनबाट सर्बियाका गोरेन जर्कोभिक, इजिप्सियन खेलाडीद्वय एल सायेद शावन र अहमेद मोहमेद माबालाले खेल्नेछन् । मेघराज केसीको प्रशिक्षणमा रहेको एफसी चितवनमा विकास खवास, विकास तामाङ, विवश चौधरी, अमित तामाङ, सिमन्त थापा, कुलदिप कार्की, विशाल सुनुवार, रुप बहादुर लामा, मनिस थापा, स्यान्सु भुषाल, विश्व अधिकारीलगायतका खेलाडीहरु रहेका छन् ।

एफसी चितवनले आफ्नो पहिलो खेल वैशाख १३ मा ललितपुर सिटी एफसीविरुद्ध खेल्नेछ । नेपाल स्पोट्र्स इभेन्टस् म्यानेजमेन्टले आयोजना गरेको एनएसएलमा विदेशी खेलाडी सहभागी सात नेपाली फुटबल क्लवले ट्रफिको लागि प्रतिस्पर्धा गर्नेछन् । सबै २५ खेल दशरथ रंगशालामा हुने आयोजकले जनाएको छ ।