आईएमई मोटर्सको गाडी खरिद गर्न एभरेष्ट बैंकले कर्जा दिने

काठमाडौं । आईएमई मोटर्सको गाडी खरिद गर्न चाहनेहरुको लागि एभरेष्ट बैंकले कर्जा उपलब्ध गराउने भएको छ । कमर्सियल भेहिकलको क्षेत्रमा प्रतिष्ठित कम्पनी अशोक लेल्यान्डको नेपालका लागि आधिकारिक बिक्रेता आईएमई मोटर्स र एभरेष्ट बैंकबीच सवारीसाधनका लागि कर्जा उपलब्ध गराउने सम्झौता भएको हो ।

उक्त सम्झौतापत्रमा आईएमई मोटर्सको तर्फबाट सीईओ हेमन्त पुराणिक र बैंकको तर्फबाट डेपुटी जनरल म्यानेजर गौरव कुमारले हस्ताक्षर गरेका छन् । सम्झौताअनुसार अशोक लेल्यान्डका देशभर रहेका १७ शोरुम वा एभरेष्ट बैंकको कुनै पनि शाखाबाट ग्राहकले सो अफरअन्तर्गतको सुविधा प्राप्त गर्न सक्नेछन् । ग्राहकको चाहनाअनुसार अशोक लेल्यान्डका सवारीसाधन किन्न बैंकले अधिकतम सात वर्षसम्मका लागि करिब १४ प्रतिशतसम्म ब्याजदरमा गाडी कर्जा उपलब्ध गराउनेछ । कर्जा प्राप्त गर्न सहज र सरल प्रक्रिया अपनाइनेछ । नेपाल राष्ट्र बैंकको नीति निर्देशनअन्तर्गत रहेर सो कर्जा उपलब्ध हुने बताइएको छ ।

नेपालको कमर्सियल सवारीसाधन बजारमा अशोक लेल्यान्डको बलियो उपस्थिति छ । देशभर शोरुम तथा सर्भिसिङसहितका टच प्वाइन्ट विस्तार कार्यलाई कम्पनीले निरन्तरता दिइरहेको छ । विगत दुई वर्षयता कम्पनीले आक्रामक रुपमा बजार विस्तार गरिरहेको जनाएको छ । हाल अशोक लेल्यान्ड, नेपालको दोस्रो ठूलो कमर्सियल भेहिकल ब्रान्ड बनेको छ । हालै कम्पनीले प्रसिद्ध लाइट कमर्सियल भेहिकल ‘दोस्त’का लागि पाँच वर्षे वारेन्टी घोषणा गरेको छ, जसले ग्राहकलाई सहज रुपमा स्वामित्वको अनुभूति प्रदान गर्ने विश्वास गरिएको छ ।