राउन्ड टेबल नेपालको आयोजनामा ‘प्याडिलक्स गल्स अन ह्विल्स’ प्रतियोगिता

काठमाडौं । राउन्ड टेबल नेपालको आयोजनामा ‘प्याडिलक्स गल्स अन ह्विल्स’ प्रतियोगिता सम्पन्न भएको छ । अन्तर्राष्ट्रिय महिला दिवसलाई केन्द्रमा राखी पूर्वमिस नेपाल ईशानी श्रेष्ठको प्रमुख आतिथ्यमा शनिबार ग्यालेक्सी पब्लिक स्कुल ज्ञानेश्वरमा ‘प्याडिलक्स गल्स अन ह्विल्स’ प्रतियोगिता सम्पन्न भएको हो ।

राउन्ड टेबल नेपालअन्तर्गतका सदस्यहरु काठमाडौं एस राउन्ड टेबल नेपाल २१, काठमाडौं रोयल्स राउन्ड टेबल २३ र काठमाडौं रोयल्स लेडिज सर्कल ७ को आयोजनामा सम्पन्न भएको प्रतियोगितामा जना कोइराला र प्रज्ञा सापकोटाको जोडी प्रथम भएका छन् । प्रथम भएका दुवै जनाले सगुन ज्वेलर्सका तर्फबाट ५० हजारबराबरको ज्वेलरी प्राप्त गरेका छन् । यसैगरी मुस्कान अग्रवाल र तानिषा अग्रवालको जोडी दोस्रो भएका छन् । उनीहरुले रिभरसाइड स्प्रिङ्ग रिसोर्टको तर्फबाट तीन दिन दुई रातको स्टे प्याकेज प्राप्त गरेका छन् । त्यसैगरी दीपा थापा र काजल श्रेष्ठको जोडीले भने तेस्रो स्थानमा चित्त बुझाएका छन् । उनीहरुको जोडीलेजेम फ्लोरिङका तर्फबाट टर्किस रग प्राप्त गरेका छन् ।

विजेताहरुलाई काठमाडौं एस राउन्ड टेबल नेपाल २१ का अध्यक्ष निश्चल रुँगटा, काठमाडौं रोयल्स राउन्ड टेबल २३ का अध्यक्ष हिमांशु गोल्छा र काठमाडौं रोयल्स लेडिज सर्कल ७ का अध्यक्ष शिवानी अग्रवालले पुरस्कार तथा प्रमाणपत्र वितरण गरेका थिए । प्रतियोगितामा ७० वटा स्कूटीमा एक सय ४० जना सहभागी थिए । स्कूटी चलाउने महिलाले स्कूटीमा चढेर विभिन्न खेलमा सहभागी भई अंक आर्जित गर्ने गरेको आधारमा विजेता घोषणा गरिएको संयोजक सिद्धार्थ जाजोदियाले जानकारी दिए । एक स्कूटीमा दुई महिला सवार थिए । काठमाडौंका छुट्टाछुट्टै स्थानमा राखिएको रमाइलो खेलहरु खेलेर बढी अंक प्राप्त गर्नेलाई विजेता घोषणा गरिएको हो । महिला अत्मबल बढाउन सवारीसाधन प्रयोग गरेर खेलहरु खेलाइएको हो ।