मेटलाइफ फाउन्डेसन र स्वावलम्बन विकास केन्द्रबीच सहकार्य

काठमाडौं । मेटलाइफ फाउन्डेसनले लघुवित्त संस्थाहरूसँग आबद्ध महिलाहरूको आर्थिक अवस्था सुदृढ बनाउने उद्देश्यले स्वावलम्बन विकास केन्द्र (सीएसडी) नेपालसँग सम्झौता गरेको छ । सम्झौताअनुसार सीएसडीले विभिन्न लघुवित्तमा आबद्ध महिला उद्यमीहरूलाई व्यावसायिक सुझाव सल्लाह र प्रशिक्षण प्रदान गरी उद्यमशीलताको दक्षता बढाउने काम गर्नेछ ।

यस्तो सहकार्यले नेपालमा महिला उद्यमीहरूका लागि समावेशी व्यावसायिक वातावरण सिर्जना गर्ने लक्ष्य राखिएको मेटलाइफले जनाएको छ । उद्यमशीलता र नवप्रवर्तन तालिम, वित्तीय तथा डिजिटल ज्ञानसम्बन्धी कार्यक्रम, राष्ट्रिय तथा अन्तर्राष्ट्रिय बजारमा पहुँच, तथा देशैभर सञ्जाल विकासजस्ता कार्यक्रमहरूमार्फत करिब पाँच हजार महिला उद्यमीहरूको उत्थानका लागि ५० हजार अमेरिकी डलर प्रयोग गरिनेछ । यस परियोजनाका लागि परामर्श कम्पनी एमएससी ग्लोबल कन्सल्टिङले नेपालभरका विभिन्न लघुवित्त संस्थाहरूमार्फत समन्वय गर्न सीएसडी नेपालसँग सम्झौता गरेको छ । यस सहयोगको उद्देश्य व्यवसायमा महिलाहरूको सहभागितालाई बढाउनु र बजारको संवेदनशीलताबाट सुरक्षा प्रदान गर्नु रहेको छ । साथै यसले डिजिटल प्रवृत्ति तथा वित्तीय विशेषज्ञताको परिचयमार्फत महिला उद्यमीहरूको डर हटाउन र उनीहरूलाई दिगो जीविकोपार्जनका लागि असल निर्णयहरू लिन आत्मविश्वास प्रदान गर्न मद्दत गर्ने समेत बताइएको छ ।