महिलालाई हेभी इक्विपमेन्ट अपरेटर तालिम

काठमाडौं । आईएमई अटोमोटिभ एस्कर्ट्सले महिलाहरुलाई निःशुल्क हेभी इक्विपमेन्ट अपरेटर, ब्याक हो लोडर, तालिमको आयोजना गरेको छ । बिहीबारदेखि सुरु भएको उक्त तालिमको नेपाल उद्योग वाणिज्य महासंघका अध्यक्ष चन्द्रप्रसाद ढकालले उद्घाटन गरेका छन् ।

कार्यक्रममा अध्यक्ष ढकालले महासंघको अध्यक्षको रुपमा आफूले राखेका पाँचवटा प्राथमिकतामा सीपयुक्त जनशक्ति उत्पादन उच्च प्राथमिकतामा रहेको बताए । जनशक्तिलाई दक्ष बनाउनसकेमा उद्योग व्यवसायमा आवश्यक दक्ष जनशक्तिको अभाव पूरा हुने र वैदेशिक रोजगारीमा जाँदा पनि प्रतिष्ठित र उच्च तलबमान पाउन सकिने हुनाले आफूले सीपमूलक तालिम र दक्ष जनशक्ति उत्पादन तथा विकासमा विशेष पहल लिने ढकालले बताए ।

अध्यक्ष ढकालले महिलालाई सीप दिई दक्ष बनाउनसके महिला सशक्तीकरणमा समेत विशेष योगदान पुग्ने धारणा राखे । यस्तै उनले यस तालिमले सीप आर्जन गरी रोजगारीको अवसर पाउने र महिलालाई हेर्ने पुरातन सामाजिक सोचमा समेत परिवर्तन आउने बताए । ‘हामीले सवारी चालक भन्नेबित्तिकै पुरुषलाई बुझ्ने गर्छौँ । तर समय बदलिएसँगै, हेभी इक्विपमेन्ट अपरेटरमा समेत महिलाहरुले आफूलाई प्रमाणित गर्न सुरु गरिसकेका छन्’, उनले भने, ‘तपाईंहरु पनि त्यो पुरातन सोच र धारणालाई परिवर्तन गर्दै ब्याक हो लोडरको तालिममा सहभागी हुनुभएको छ । तपाईंहरुले राम्रोसँग तालिममा सहभागी भई सीप सिकेर दक्ष बन्न भरपूर प्रयास गर्नुहोला । यसले सीप सिकेर रोजगारी मात्र होइन महिला सशक्तीकरणमा पनि ठूलो प्रभाव पार्नेछ ।’

तालिममा सहभागी महिलाहरुलाई सुरक्षित र प्रभावकारीरुपमा ब्याक हो लोडर अपरेसन गर्न आवश्यक सबै किसिमका सीप तथा ज्ञान प्रदान गरिने बताइएको छ । तालिममा १५ जना महिलाहरु सहभागी छन् ।