दोस्रो पोस्टग्रे एसक्यूएल कन्फेरेन्स नेपाल सम्पन्न

काठमाडौं । दोस्रो पोस्टग्रे एसक्यूएल कन्फेरेन्स नेपाल सम्पन्न भएको छ । नेपाल पोस्टग्रे एसक्यूएल युजर ग्रुप (एनपी पग)ले दोस्रो पोस्टग्रे एसक्यूएल कन्फेरेन्स आयोजना गरेको हो । कन्फेरेन्स वैशाख २६ देखि २९ गतेसम्म काभ्रेको धुलीखेलमा सम्पन्न भएको आयोजकले जनाएको छ । कन्फेरेन्स काठमाडौं विश्वविद्यालयमा सञ्चालन भएको थियो ।

सन् २०१८ को एसक्यूएल कन्फेरेन्स सफल भएपछि संस्थाले दोस्रो पटक पनि आयोजना गरेको हो । कन्फेरेन्समा पोस्टग्रे एसक्यूएल युजर ग्रुप कम्युनिटीका लोकप्रिय व्यक्ति र अरु स्थानीय वक्ताहरूसँग छलफल गरिएको थियो । चार दिनसम्म चलेको उक्त कन्फेरेन्समा फरक–फरक क्षेत्रका व्यक्तिहरू सहभागी थिए । खासगरी औद्योगिक, सरकारी, एकेडेमिक आदि क्षेत्रका व्यक्तिहरू कार्यक्रममा सहभागी भएको आयोजकले जनाएको छ । कन्फेरेन्सभन्दा अघि दुई दिनको प्रि कन्फेरेन्स ट्रेनिङ सेसन आयोजना गरिएको थियो । वैशाख २६ र २७ मा शिक्षा, उद्योग, सरकारी र गैरसरकारी क्षेत्रहरूबाट करिब ३५ जनाले प्रशिक्षण लिएका थिए । यस वर्ष रूस, अमेरिका, भारत र पाकिस्तानलगायत आठ देशका अन्तर्राष्ट्रिय वक्ताहरू उपस्थित भएका थिए ।