सल्युट गोर्खा ट्रेनिङका सञ्चालक दुबईमा सम्मानित

काठमाडौं । पोखरा १४ चाउथेमा रहेको सल्युट गोर्खा ट्रेनिङ सेन्टर प्रालिका सञ्चालक राहुल पाण्डे दुबईमा योङ इन्टरप्रेन्योर अफ द इयर २०२३ बाट सम्मानित भएका छन् । ग्लोबल एम्पायर इभेन्ट्स र बिजनेस टिभीको संयुक्त आयोजनामा दुबईमा भएको कार्यक्रममा पाण्डे आइकन अफ एसिया अवार्डमा क्रियटिभ इन्टरप्रेन्योर अफ द इयरबाट सम्मानित भएका हुन् । उनलाई ग्लोबल एम्पायर र बिजनेसनका प्रबन्ध निर्देशक उदयवीर सिंह बिन्द्राले सम्मान गरेका हुन् । आइकन अफ एसिया अवार्डमा आठ राष्ट्रभन्दा बढीको सहभागिता रहेको थियो । सञ्चालक पाण्डेले अवार्ड प्राप्त गर्नु उपलब्धिसँगै जिम्मेवारी पनि थपिएको बताए । उनले आफ्नो व्यवसायलाई अगाडि थप बढाउन र निरन्तरताका लागि दृढ संकल्प गरे । सन् २००९ मा पोखरामा स्थापना भएको यस ट्रेनिङ सेन्टरका शाखाहरू काठमाडौं, ललितपुर, सुर्खेत, दाङ, बुटवल, चितवन र धरानमा रहेका छन् ।

सेन्टर स्थापना कालदेखि नै नेपालबाट दक्ष र इमान्दार युवा जनशक्ति उत्पादन गरी ब्रिटिस आर्मी, सिङ्गापुर पुलिस, इन्डियन आर्मी, नेपाल आर्मीलगायत विभिन्न देशहरूमा गोर्खा सैनिक भर्ती गराउन सफल संस्था हो । संस्थाले एसियाको बेस्ट गोर्खा भर्ती तथा प्रशिक्षण एकेडेमी अवार्ड र एसियाको उत्कृष्ट अन्तर्राष्ट्रिय प्रशिक्षण केन्द्र अवार्ड पाएको थियो ।