प्रोग्रेसिभ फाइनान्सको सीईओमा अनिल श्रेष्ठ

काठमाडौं । प्रोग्रेसिभ फाइनान्स लिमिटेडको सञ्चालक समितिको बैंठकले यही असार १५ गते शुक्रबारदेखि लागू हुनेगरी अनिल श्रेष्ठलाई प्रमुख कार्यकारी अधिकृतमा नियुक्त गरेको छ । समितिले चार वर्षका निम्ति उनलाई नियुक्त गरेको हो । विभिन्न वित्तीय संस्थाहरूमा २७ वर्ष लामो कार्यानुभव हासिल गरेका श्रेष्ठले झण्डै १३ वर्ष रिलायन्स फाइनान्स लिमिटेडको प्रमुख कार्यकारी अधिकृतका रूपमा नेतृत्वदायी भूमिका निर्वाह गरिसकेका छन् ।

बैंक तथा वित्तीय क्षेत्रमा अनुभवी मानिएका श्रेष्ठले शंकरदेव क्याम्पसबाट स्नातकोत्तर उपाधि हासिल गरी युनिभरसिटी अफ क्यालिफोर्नियाबाट व्यावसायिक सञ्चार विषयमा तालिमसमेत लिएका छन् । वित्तीय जोखिम व्यवस्थापन तथा अनुपालनमा राम्रो अनुभव हासिल गरेका श्रेष्ठको नेतृत्वमा संस्थाले थप उचाइ हासिल गर्ने विश्वास फाइनान्सको सञ्चालक समितिले गरेको छ । श्रेष्ठले आफ्नो कार्यकालमा संस्थालाई अझ सबल, सक्षम र उत्कृष्ट बनाउन हरसम्भव प्रयास गर्ने बताउँदै यसका निम्ति सबै क्षेत्रबाट आवश्यक सहयोग पाउनु नै आफूहरूको उद्देश्य रहेको बताए ।

एटीएम, मोबाइल बैंकिङ, इ–बैंकिङ, आईपीएस, कनेक्ट आईपीएस, क्यूआर पेमेन्ट, सी आस्वा, डीम्याटलगायत प्रविधिमा आधारित आधुनिक डिजिटल बैकिङ तथा रेमिट्यान्स सेवाहरूको उपलब्धता रहेको यस प्रोग्रेसिभ फाइनान्सले हाल २२ वटा शाखा तथा चारवटा विस्तारित काउन्टरमार्फत सम्पूर्ण बैकिङ सेवाहरू प्रवाह गरिरहेको छ ।