रिलायबल नेपाल लाइफको आईपीओ २७ गतेदेखि

काठमाडौं । रिलायबल नेपाल लाइफ इन्स्योरेन्स कम्पनीले साधारण सेयरको बिक्री आह्वान गरेको छ । कम्पनीले बैदेशिक रोजगारीमा रहेका नेपाली नागरिकको लागि प्रिमियम मूल्यमा साधारण सेयरको बिक्री आह्वान गरेको हो । यसअन्र्तगत कम्पनीले एक सय रुपैयाँ अंकित मूल्यमा एक सय ५७ रुपैयाँ प्रिमियम थप गरी प्रतिकित्ता दुई सय ५७ रुपैयाँमा अन्तिम मूल्यमा साधारण सेयरको बिक्री आह्वान गरेको छ ।

जारी पुँजी चार अर्ब रुपैयाँ रहेको कम्पनीले ३० प्रतिशतका दरले हुन आउने एक अर्ब २० करोड रुपैयाँ बराबरको एक करोड २० लाख कित्ता साधारण सेयरको बिक्री आह्वान गरेको छ । जसमध्ये १० प्रतिशत अर्थात् १२ लाख कित्ता सेयर नेपाल सरकारको सम्बन्धित निकायबाट श्रम स्वीकृति प्राप्त गरी विदेशमा रोजगारीमा रहेका नेपाली नागरिकका लागि, कुल सेयरको पाँच प्रतिशत अर्थात् छ लाख कित्ता सेयर सामूहिक लगानी कोषको लागि र पाँच प्रतिशत अर्थात् छ लाख कित्ता सेयर कम्पनीका कर्मचारीका लागि (प्रतिसेयर अंकित मूल्य १०० रुपैयाँका दरले) छुट्याइएको छ । सोअनुसार सर्वसाधारण लगानीकर्ताले बाँकी रहेको ९६ लाख कित्ता सेयरका लागि आवेदन दिन सक्ने कम्पनीको भनाइ छ ।

पहिलो चरणमा भने कम्पनीले वैदेशिक रोजगारीमा रहेका नेपालीको लागि साधारण सेयरको बिक्री आह्वान गरेको छ । यसअन्तर्गत यही असार २७ गतेबाट खुल्ला हुने साधारण सेयरको बिक्री कार्य यही साउन १० गतेसम्म कायम रहने छ । खरिदकर्ताले न्यूनतम १० देखि अधिकतम पाँच हजार चार सय कित्तासम्मको सेयर खरिदको लागि आवेदन दिन सक्ने छन् । कम्पनीको सेयर निष्काशन एवं बिक्री प्रबन्धकको रूपमा भने सिभिल क्यापिटल मार्केट्स लिमिटेड रहेको छ ।