नबिल बैंकको नयाँ शाखा पुतलीसडकमा

काठमाडौं । नबिल बैंकले काठमाडौंको पुतलीसडकमा नयाँ शाखा खोलेको छ । पुतलीसडकस्थित बन्दीपुर कम्प्लेक्समा शुक्रबारदेखि नयाँ नयाँ शाखा सञ्चालनमा ल्याएको बैंकले जनाएको छ । शैक्षिक हवका रूपमा स्थापित सो क्षेत्रमा स्थापना गरिएको शाखाबाट विशेषगरी विद्यार्थीका लागि बैंकिङ पहुँच दिने लक्ष्य राखिएको बैंकले जनाएको छ ।

शाखाको उद्घाटन नबिल बैंकका निर्देशक अनन्त पौड्याल तथा प्रमुख कार्यकारी अधिकृत ज्ञानेन्द्रप्रसाद ढुंगानाले गरेका हुन् । सो अवसरमा निर्देशक पौड्यालले शैक्षिक परामर्श हबका रुपमा परिचित पुतलीसडकमा स्थापित शाखाले विद्यार्थी, अभिभावक तथा परामर्श केन्द्र सेवा दिने बताए । शैक्षिक कर्जालगायत सबै बैंकिङ सेवा एकै ठाउँबाट दिने उद्देश्यका साथ यो शाखा उद्घाटन गरिएको सीईओ ढुंगानाले बताए । उनले सेवाग्राहीको मागलाई सम्बोधन गर्नका लागि नयाँ शाखा विस्तार गरिएकोे जनाए । यो नबिलको दुई सय ५६ औँ शाखा हो ।

यस शाखाले विद्यार्थीकोे शैक्षिक गतिविधिका साथै वैदेशिक शिक्षाका लागि समेत बैंकिङ सुविधा दिने लक्ष्य राखिएको ढुंगानाले बताए ।

नयाँ शाखाको विशेष प्राथमिकता शैक्षिक कर्जामा हुने बताउँदै शाखा प्रमुख विनय देवकोटाले सेवाग्राही विद्यार्थी, अभिभावक तथा परामर्शदातालाई सरल बैकिङ सेवा प्रदान गर्न सधैं तत्पर रहने बताए । उद्घाटन समारोहमा फेकनका अध्यक्ष वासुदेव नेपाल, इरिनका अध्यक्ष हेमन्त भट्टराई, एरी नेपालका अध्यक्ष महेशबाबु तिमिल्सिना, इक्यानका अध्यक्ष प्रकाश पाण्डे, नाएरका अध्यक्ष प्रेम पाण्डे र नेकाका अध्यक्ष सन्तोष प्याकुरेलका साथै युनिभर्सल ल्याग्वेजका संस्थापक उत्तम पन्तको सहभागी थिए । उनीहरूले विद्यार्थीलाई शैक्षिक गतिविधिका लागि चाहिने बैंकिङ सेवा नबिलले सहज वातावरणमा सरल किसिमले प्रदान गर्ने विश्वास व्यक्त गरे ।

नियमित बैंकिङ सेवाका साथै शैक्षिक कर्जा चाहने सेवाग्राहीलाई एकद्वार सेवा प्रदान गर्ने लक्ष्य बैंकको छ । शिक्षा हबका रुपमा रहेको नबिल बैंकको यस शाखाले आईएलटीएस, टोफेल, जीआरआई, एसईटीलगायतका परीक्षाको दर्ता शुल्क, भिसा प्रक्रिया शुल्क, कलेज तथा विश्वविद्यालयमा ट्युसन शुल्क र अन्य शुल्कका लागि विदेशी मुद्रा विनिमयलगायतका सुविधा यो शाखाबाट पाइने बैंकले जनाएको छ ।

बैंकको कुल निक्षेप पछिल्लो हाल तीन खर्ब ७८ अर्ब रुपैयाँ छ भने कुल कर्जा तीन खर्ब ४० अर्ब छ । बैंकले देशभर कुल दुई सय ५६ वटा शाखा, दुई सय ८३ वटा एटीएम काउन्टमार्फत आफ्ना २० लाखभन्दा बढी ग्राहकलाई वित्तीय सेवा उपलब्ध गराउँदै आएको छ ।