पशुपति विकास कोषलाई प्रभु बैंकद्वारा हाइड्रोलिक गाडी उपहार

काठमाडौं । प्रभु बैंकले पशुपति विकास कोषलाई हाइड्रोलिक गाडी र फोहोर उठाउन प्रयोग हुने सामग्री हस्तान्तरण गरेको छ । संस्थागत सामाजिक उत्तरदायित्वअन्तर्गत पशुपति विकास कोषलाई हाइड्रोलिक गाडी हस्तान्तरण गरिएको बैंकले जनाएको छ ।

बैंकका प्रमुख कार्यकारी अधिकृत अशोक शेरचनले सोमबार संस्कृति, पर्यटन तथा नागरिक उड्डयन मन्त्री सुदन किराँतीलाई गाडीको चाबी हस्तान्तरण गरेका हुन् । १७ लाख रुपैयाँ बराबरको यो गाडी फोहोर उठाउनका लागि प्रयोग गरिने बताइएको छ । पशुपति क्षेत्रमा दैनिक सिर्जना हुने फोहोरजन्य सामग्री व्यवस्थापनका लागि गाडीले थप सहयोग पुग्ने अपेक्षा बैंकले गरेको छ ।

टाटाको एस हपर सिरिजको टिपर दैनिक सञ्चालनका लागि एक चालकलाई पारिश्रामिक स्वरूप २५ हजार रुपैयाँ व्यवस्था गर्ने मन्त्रालयले जनाएको छ । मन्त्रालयले एक वर्षका लागि पारिश्रामिकबापत तीन लाख रुपैयाँ उपलब्ध गराउने मन्त्रालयले जनाएको छ । बैंकले आउँदा दिनमा पनि मन्त्रालय र पशुपति विकास कोषसँगको सहकार्य गरेर अघि बढ्ने योजना बनाएको बैंकका प्रमुख कार्यकारी अधिकृत शेरचनले जानकारी दिए । बैंकले आफ्नो सामाजिक उत्तरदायित्वअन्तर्गत विभिन्न क्षेत्रमा सहयोग गर्दै आएको छ ।