कृषि विकास बैंक र दराजबीच सम्झौता

काठमाडौं । कृषि विकास बैंक र दराजबीच सम्झौता भएको छ । बैंकले अनलाइन ई–कमर्स प्लेटफार्म दराज नेपालसँग महाबचत बजार अभियानको लागि छुट उपलब्ध गराउने बारेमा सम्झौता गरेको हो ।

सम्झौतामा बैंकका तर्फबाट प्रमुख सञ्चालन अधिकृत, प्रताप सुवेदी र दराजका हेड अफ पेमेन्ट, अरुण फुयाँलले हस्ताक्षर गरेका छन् । दराज अनलाइन प्लेटफार्ममा ग्राहकका लागि उपभोग्य सामग्रीजस्तै खाद्य सामग्री, मसलाजन्य, इलेक्ट्रिकललगायत त्यसमा उपलब्ध सम्पूर्ण सामानहरू खरिदमा बैंकको कार्ड प्रयोग गर्दा छुट पाउने गरी सम्झौता भएको हो ।

सम्झौतापछि महाबचत बजार अभियानमा ग्राहकले अब प्रि–पेमेन्टमा १० प्रतिशत वा अधिकतम एक हजार बराबरको छुट पाउन सक्नेछन् । त्यसैगरी दराजबाट खरिद गर्दा ग्राहकले १५ प्रतिशत वा अधिकतम एक हजार पाँच सय रूपैयाँसम्मको छुट पाउने भएका छन् । ग्राहकले तोकिएको छुटहरूको लाभ लिनका लागि आफ्नो बैंक कार्डमा ई–कम सेवा सक्रिय गर्नुपर्नेछ ।

कृषि विकास बैंक र दराजबीच भएको यस सम्झौताले दुवै पक्षका ग्राहकलाई महाबचत बजारमा छुटको भरपूर लाभ लिन सहज बनाउने विश्वास बैंकले लिएको छ । तोकिएको प्रि–पेमेन्ट छुटहरू महाबचत बजारको लाइभ पिरियड २० देखि ३० जुलाईमा मात्रै उपलब्ध हुने बताइएको छ ।