नेपाल एसबीआई बैंकले ऋणपत्र जारी गर्ने

काठमाडौं । नेपाल एसबीआई बैंकले ऋणपत्र जारी गर्ने भएको छ । बैंकले एक हजार अंकित मूल्य कायम रहने गरी दुई अर्ब रूपैयाँ बराबरको २० लाख कित्ता ऋणपत्र जारी गर्न लागेको हो । बैंकका अनुसार वार्षिक नौ प्रतिशत ब्याजदर तोकेर १० वर्षे अवधिको नेपाल एसबीआई बैंक ऋणपत्र २०८९ जारी गर्न लागेको हो । जारी गरिने कुल ऋणपत्रमध्ये ६० प्रतिशत अर्थात् २० लाख कित्ताको दरले हुन आउने एक अर्ब २० करोड रूपैयाँ बराबरको ऋणपत्र व्यक्तिगत तवरबाट बिक्री हुने बताइएको छ । यसैगरी ४० प्रतिशत अर्थात् आठ लाख कित्ताको दरले हुन आउने ८० करोड रूपैयाँ बराबरको ऋणपत्र भने सर्वसाधारणका लागि बिक्री गरिने कम्पनीले जनाएको छ । यसमा पाँच प्रतिशत अर्थात् ४० हजार कित्ता ऋणपत्र भने सामूहिक लगानी कोषको लागि छुट्याइएको बताइएको छ ।

बैंकका अनुसार खरिदकर्ताले न्यूनतम २५ देखि अधिकतम आठ लाख कित्तासम्मको ऋणपत्र खरिदको लागि आवेदन दिन सक्ने छन् । यसको बिक्री प्रबन्धकमा एनएमबी क्यापिटल लिमिटेड रहेको छ । बैंकको ऋणपत्रको बिक्री कार्य यही साउन १८ गतेबाट सुरु भई छिटोमा यही साउन २२ गते र ढिलोमा साउन ३२ गते बन्द हुने बताइएको छ ।