सिटिजन्स बैंक र दराजबीच छुट सम्झौता

काठमाडौं । सिटिजन्स बैंक इन्टरनेसनल लिमिटेड र दराज क्यामु प्राइभेट लिमिटेडबीच सिटिजन्स बैंकका ग्राहकलाई दराजमा सामान किन्दा विशेष छुट दिनेसम्बन्धी सम्झौतामा हस्ताक्षर भएको छ । सम्झौतापश्चात् सिटिजन्स बैंकका कार्डबाहकले हरेक बिहीबार दराजमा अनलाइनमार्फत भुक्तानी गर्दा पाँच सय रुपैयाँसम्म छुट पाउन सक्ने बताइएको छ । यसका साथै सिटिजन्स बैंकबाट यही अगस्ट १ तारिखपश्चात् नयाँ कार्ड प्राप्त गर्नुहुने ग्राहकले दराजमा पहिलोपटक कारोबार गर्दा समेत थप एक सय ५० रुपैयाँसम्मको भौचर प्राप्त गर्न सक्ने बताइएको छ ।

थापाथलीस्थित रोटरी कम्प्लेक्समा रहेको दराज क्यामुको कार्यालयमा आयोजित कार्यक्रममा बोल्दै बैंकका मास बैकिङ अधिकृत मानन्धरले यस किसिमको सहकार्यबाट सिटिजन्स बैंकका कार्डबाहकलाई फाइदा पुग्नुका साथै कार्डको प्रयोग बढ्ने र डिजिटल सेवाको विकास हुने धारणा व्यक्त गरे । सो अवसरमा दराजका प्रमुख सञ्चालन अधिकृत अर्यालले दराज समग्र ई–कमर्स क्षेत्रको विकासको लागि प्रतिबद्ध रहेको जनाउँदै आगामी दिनमा समेत बैंकसँग सहकार्य गर्दै अगाडि बढ्ने र डिजिटल कारोबारलाई थप प्रवद्र्धन गर्दै जाने धारणा राखे ।

बैंकले डिजिटल बैंकिङ माध्यमको प्रयोगलाई बढाउन र ग्राहकलाई डिजिटल माध्यमबाट भुक्तानी गर्न प्रोत्साहन गर्न समयसमयमा ग्राहकमैत्री सुविधा सञ्चालनमा ल्याउँदै आएको छ । डिजिटल कारोबार गर्दा पाइने छुटसम्बन्धी विस्तृत विवरण सिटिजन्स बैंकको वेबसाइटमा प्राप्त गर्न सकिने बताइएको छ ।