नबिल बैंक र गणपति वनस्पतिबीच सम्झौता

काठमाडौं । नबिल बैंक लिमिटेडले लक्की ग्रुपअन्तर्गतको खाने तेल प्रशोधन गर्ने उद्योग गणपति वनस्पति लिमिटेडका आधिकारिक डिलर तथा विक्रेतालाई च्यानल फाइनान्सिङ सुविधा दिने भएको छ । मंगलबार राजधानीको एक होटलमा आयोजित कार्यक्रममा गणपतिका तर्फबाट कम्पनीका अध्यक्ष तथा लक्की ग्रुपका प्रबन्ध निर्देशक अमित मोर र नबिल बैंकका तर्फबाट बैंकका प्रमुख कार्यकारी अधिकृत ज्ञानेन्द्र ढुङ्गानाले सम्झौतामा हस्ताक्षर गरेका हुन् ।

कार्यक्रममा कम्पनीका तर्फबाट लक्की ग्रुपका अध्यक्ष सतिश कुमार मोर, उपाध्यक्षद्वय श्रवणकुमार मोर र राजकुमार मोरका साथै कार्यकारी निर्देशकहरू अनन्ता मोर, क्रषिराज मोर, राजीव मोर र कम्पनीका उच्च पदस्थ कर्मचारीको उपस्थिति थियो भने बैंकको तर्फबाट नायब प्रमुख कार्यकारी अधिकृतहरू मनोज ज्ञवाली, सुजित शाक्य, भुपेन्द्र पाण्डे, कर्पोरेट हेड ज्ञानेन्द्र शाहलगायतका कर्मचारीको उपस्थिति थियो । नेपाल गुणस्तर चिह्न तथा आईएसओ ९००१ः २०१५, १४००१ :२०१५ प्राप्त यस उद्योगले सफारी र रामदेव ब्राण्डमा प्रशोधित सनफलावर तेल, सोयाबिन तेल, तोरी तेल र पामोलिन तेल बिक्री वितरण गर्दै आएकोमा हालै मात्र नेवारी प्लस ब्राण्डलाई पनि बजारमा ल्याएको छ । मेक इन नेपाल—स्वदेशी अभियानमा संलग्न नेपालकै सबैभन्दा ठूलो घिऊ तेल उत्पादन गर्ने यो कम्पनी सर्वाधिक निर्यातकर्ता भई लगातार तीन पटकसम्म नेपाल उद्योग परिसंघबाट सम्मानित भएको संस्था हो ।