एनआईसी एसियाको चौथो त्रैमासिक वित्तीय विवरण सार्वजनिक

काठमाडौं । एनआईसी एसिया बैंक लिमिटेडले आ.व. २०७९/८० को चौथो त्रैमासको अपरिष्कृत वित्तीय विवरण प्रकाशित गरेको छ । बैंकिङ क्षेत्रको विभिन्न वित्तीय सूचकाङ्कमा अग्रणी स्थान ओगटेको बैंकका समग्र वित्तीय विवरणको परिसूचक उत्साहजनक रहेको बैंकद्वारा जारी गरी विज्ञप्तिमा उल्लेख छ ।

बैंकले आव २०७९/८० को चौथो त्रैमाससम्ममा कर्जा व्यवसायतर्फ कुल कर्जा रकम दुई खर्ब ७१ अर्ब ५९ करोड रुपैयाँ पु-याएको छ । साथै, निक्षेपतर्फ कुल निक्षेप संकलन तीन खर्ब १४ अर्ब ३१ करोड रुपैयाँ पु-याएको हो । बैंकले यस त्रैमाससम्ममा खुद मुनाफातर्फ चार अर्ब ६५ करोड रुपैयाँ आर्जन गर्न सफल भएकोे छ, जुन वार्षिक विन्दुगत आधारमा १० प्रतिशतको वृद्धि हो । यसैगरी बैंकको स्व–पुँजीमा प्रतिफल १७ दशमलव शून्य सात प्रतिशत रहेको छ । साथै, यस बैंकले वार्षिक प्रतिसेयर आम्दानी ४० रुपैयाँ २२ पैसा आर्जन गर्न बैंक सफल भएको छ । स्व–पुँजीमा प्रतिफल र प्रतिसेयर आम्दानी २० वटै वाणिज्य बैंकमध्ये अग्रणी रहेको अनुमान बैंकले गरेको छ । बैंकले कर्जा असुलीमा निकै उत्साहजनक नतिजा हासिल गर्न सफल भई निष्कृय कर्जा अनुपातलाई चौथो त्रैैमाससम्ममा शून्य दशमलव ८० प्रतिशतमा सीमित राख्न सफल भएको छ ।

आव २०७९/८० मा छ लाख बढी नयाँ ग्राहकहरू थप गर्दै ३८ लाखभन्दा बढी ग्राहक माझ सेवा प्रदान गर्दै आइरहेको बैंकले जनाएको छ । पछिल्लो त्रैमाससम्ममा बैंकले कुल कर्जा लगानीको अंशमा करिब ८८ प्रतिशत साना तथा मझौला र रिटेल प्रकारका रणनीतिक क्षेत्रमा कर्जा विस्तार गरेको छ । साना तथा मझौला कर्जा लगानीमा मुलुकका समग्र वाणिज्य बैंकभन्दा यस बैंक अग्रणी स्थानमा रहेको बैंकको अनुमान रहेको छ । एनआईसी एसिया बैंक मुलुकमा सबैभन्दा धेरै बैंकिङ सञ्जालहरू भएको बैंकमध्येको एक हो । बैंकले मुलुकभर तीन सय ६० वटा शाखा कार्यालयहरू, पाँच सय ५९ वटा एटीएम, एक सय ११ वटा विस्तारित काउन्टर एवम् ६१ वटा शाखारहित शाखा सञ्जाल विस्तार गरेको जनाएको छ ।