मुक्तिनाथ क्यापिटल र गुरु ट्राभल्सबीच सहकार्य

काठमाडौं । मर्चेन्ट बैंकिङ कम्पनी मुक्तिनाथ क्यापिटल लिमिटेड तथा गुरु ट्राभल्स लिमिटेडबीच व्यावसायिक सहकार्यसम्बन्धी सहमतिपत्रमा हस्ताक्षर भएको छ । सोमबार मुक्तिनाथ क्यापिटल लिमिटेडका प्रमुख कार्यकारी अधिकृत कविन्द्रध्वज जोशी तथा गुरु ट्राभल्स लिमिटेडका प्रमुख कार्यकारी अधिकृत नवराज धरेलबीच सहमतिपत्रमा हस्ताक्षर भएको छ ।

सहमतिपत्रमा उल्लेख भएबमोजिम मुक्तिनाथ क्यापिटल लिमिटेडले डिम्याट खाता सञ्चालन, पोर्टफोलियो मेनेजमेन्ट सेवालगायतका आफ्ना सेवाहरू सुलभ दरमा प्रदान गर्ने तथा गुरु ट्राभल्स लिमिटेडले ट्राभल्स सेवाअन्तर्गत युरोप, एसिया तथा अन्य गन्तव्यका प्याकेजहरूमा विशेष छुट तथा सुविधाहरू प्रदान गर्ने सहमति भएको जनाइएको छ । व्यावसायिक सहकार्यका अतिरिक्त सामाजिक अभियानहरू तथा संस्थागत सामाजिक क्रियाकलापमा आपसी सहकार्य गरी समन्वयात्मक ढंगबाट गर्ने गराउने पनि सहमति भएको छ । समारोहमा मुक्तिनाथ क्यापिटलका प्रमुख कार्यकारी अधिकृत जोशीले यो सहकार्यमा जोडिन पाएकोमा खुसी व्यक्त गरे । गुरु ट्राभल्स लिमिटेडका प्रमुख कार्यकारी अधिकृत धरेलले आपसी सहकार्यबाट व्यावसायिक उचाइ हासिल हुने अपेक्षा राखे । समारोहमा दुइटै संस्थाका वरिष्ठ कर्मचारीहरूका उपस्थिति रहेको थियो ।