प्राइम कमर्सियल बैंकको प्रमुख कार्यकारी अधिकृतमा मानन्धर

काठमाडौं । प्राइम कमर्सियल बैंकको प्रमुख कार्यकारी अधिकृतको पदमा सञ्जीव मानन्धर नियुक्त भएका छन् । बैंकको शुक्रबार सम्पन्न भएको सञ्चालक समिति बैठकले बैंकको रिक्त प्रमुख कार्यकारी अधिकृत पदमा बैंक तथा वित्तीय संस्था सम्बन्धी ऐन, २०७३ को दफा २९ बमोजिम चार्टर्ड एकाउन्टेन्ट मानन्धरलाई प्रमुख कार्यकारी अधिकृतका रूपमा नियुक्त गरेको हो ।

नवनियुक्त प्रमुख कार्यकारी अधिकृत मानन्धरले ऐनको दफा १२७ बमोजिम सोही दिन सञ्चालक समितिका अध्यक्ष राजेन्द्रदास श्रेष्ठ समक्ष पद तथा गोपनियताको शपथ ग्रहण गरेका हुन् । शपथग्रहण समारोहमा संक्षिप्त सम्बोधन गर्दै लामो समयदेखि यस बैंकमा आबद्ध नवनियुक्त प्रमुख कार्यकारी अधिकृत मानन्धरको नेतृत्वमा बैंकले उत्तरोत्तर प्रगति गर्ने आशा व्यक्त गरी निजको कार्यकालको पूर्ण सफलताको लागि अध्यक्ष श्रेष्ठले शुभकामना व्यक्त गरे ।

स्थापनाकालदेखि नै यस बैंकमा महाप्रबन्धकका रूपमा कार्यरत मानन्धर यसअघि यसै बैंकको कायममुकायम प्रमुख कार्यकारी अधिकृत पदमा रहेका थिए । प्रमुख कार्यकारी अधिकृत मानन्धरको बैंकिङ क्षेत्रमा २३ वर्षभन्दा लामो अनुभव छ । तत्कालीन नेपाल इन्भेस्टमेण्ट बैंकबाट बैंकिङ क्यारियर सुरु गरेका चार्टर्ड एकाउन्टेन्ट मानन्धरले राष्ट्रिय वाणिज्य बैंकको विदेशी व्यवस्थापनसँग आबद्ध रही कार्य गरिसकेका छन् ।