इ–सेवा र नागरिक लगानी कोषबीच सेवा विस्तारसम्बन्धी सम्झौता

काठमाडौं । नेपालको अग्रणी भुक्तानी प्रदायक संस्था इ–सेवा प्रालि र नागरिक लगानी कोषबीच सेवा विस्तारबारे सोमबार एक सम्झौता सम्पन्न भएको छ । सम्झौताअनुसार नागरिक लगानी कोषका सेवाग्राहीले इ–सेवा एप प्रयोग गरेर नागरिक पेन्सन योजनाको मासिक भुक्तानी तथा सबै कर्जाको भुक्तानी सजिलै गर्न सक्ने बताइएको छ ।

सम्झौतामा इ–सेवाका तर्फबाट प्रमुख कार्यकारी अधिकृत जगदीश खड्का तथा नागरिक लगानी कोषका तर्फबाट निर्देशक सीए शोभा श्रेष्ठले हस्ताक्षर गरेका थिए । हाल ८० लाख प्रयोगकर्ताको सञ्जाल रहेको इ–सेवा र नागरिक लगानी कोषको यो सहकार्यले नेपाल सरकारको डिजिटल नेपाल को अवधारणालाई टेवा दिँदै विद्युतीय भुक्तानीलाई अभिप्रेरित गर्ने विश्वास लिइएको इ–सेवाले जनाएको छ । हाल इ–सेवाको सेवा एन्ड्रोइड तथा आईओएस मोबाइलमार्फत ८० लाख बढी ग्राहकले सेवा लिइरहेका छन् ।

यसैगरी देशभर रहेका दुई लाख १५ हजारभन्दा बढी एजेन्ट (इ–सेवा जोन तथा पोइन्ट)मार्फत अप्रत्यक्षरूपमा करिब डेढ करोड जनसंख्याले सेवा लिइरहेका छन् । इ–सेवाबाट इन्स्योरेन्सको प्रिमियम भुक्तानी मोबाइल, टेलिफोन, इन्टरनेट, बिजुली तथा खानेपानीको महसुल भुक्तानी, रिचार्ज, हवाईजहाज, बसको टिकट, लोकसेवा आयोगको आवेदन दस्तुर, आन्तरिक राजस्व कार्यालयको राजस्व, स्कुल कलेजको शुल्क भुक्तानी गर्न सकिन्छ ।