‘एनएमबी बुद्ध भिसा डेबिट कार्ड’ सार्वजनिक

काठमाडौं । एनएमबी बैंकको एनएमबी बुद्ध भिसा डेबिट कार्ड सार्वजनिक भएको छ । एनएमबी बैंक लिमिटेड र बुद्ध एयरले एनएमबी बुद्ध भिसा डेबिट कार्ड सार्वजनिक गरेका छन् । यो कार्डले ग्राहकको यात्रालाई अझै सहज बनाउने विश्वास एनएमबी बैंक र बुद्ध एयरले लिएका छन् । को–ब्रान्डेड डेबिट कार्डका ग्राहकले काठमाडौं उपत्यकाभित्र रहेका बुद्ध एयरका तीन काउन्टरहरू, एयरपोर्ट, सिनामंगल र जावलाखेलबाट हवाई टिकट खरिद गर्दा हवाई भाडामा १० प्रतिशत छुट पाउने बताइएको छ ।

यसको साथै ग्राहकहरूले आन्तरिक टर्मिनलबाट यात्रा गर्दा थप ५ किलो सामान निःशुल्क लान सक्ने बैंकको भनाइ छ । एनएमबी बुद्ध भिसा डेबिट कार्ड प्रयोेग गर्ने ग्राहकलाई शतप्रतिशत भाडा (शतप्रतिशत क्यास ब्याक) फिर्ता गर्नु यो कार्डको मुख्य विशेषता रहेको र नेपालको जुनसुकै कुनामा रहेका एटीएमबाट निःशुल्क नगद झिक्ने सुविधा समेत यस कार्डका प्रयोगकर्तालाई प्रदान गरिएको बैंकले बताएको छ । बैंकले हाल देशभर दुई सय एक वटा शाखा, एक सय ४६ एटीएम र १२ एक्सटेन्सन काउन्टरमार्फत् उच्चस्तरीय सेवा प्रदान गर्दै आइरहेको छ ।