एनआईएमबी एस क्यापिटलको आयोजनामा ‘विश्व लगानीकर्ता सप्ताह’

काठमाडौं । एनआईएमबी एस क्यापिटल लि.को आयोजनामा ‘विश्व लगानीकर्ता सप्ताह–२०२३’ को सन्दर्भमा आज सिराईचुली होटल, भरतपुर, चितवनमा एक अन्तरक्रिया कार्यक्रमको आयोजना गरिएको थियो । नेपाल मर्चेन्ट बैंकर एसोसिएसनको पहलमा आयोजना भएको उक्त कार्यक्रममा नेपाल धितोपत्र बोर्डका प्रतिनिधि सानु खड्काको समेत उपस्थिति रहेको थियो ।

विश्व लगानीकर्ता सप्ताह–२०२३ एक हप्ता लामो, आईओएससीओद्वारा प्रवर्द्धन गरिएको विश्वव्यापी अभियान हो, जसले लगानीकर्ता शिक्षा र संरक्षणको महत्वबारे चेतना जगाउन र यी दुई महत्वपूर्ण क्षेत्रहरूमा धितोपत्र नियामकहरूको विभिन्न पहलहरूलाई केन्द्रीकृत गर्दछ ।

कार्यक्रमको मुख्य वक्ता एनआईएमबी एस क्यापिटल लि.का महाप्रबन्धक सचिन्द्र ढुंगाना रहेका थिए भने अन्तरक्रिया सत्रलाई कर्पोरेट एडभाइजरी विभाग प्रमुख भुवनराज पन्त र पीएमएस प्रमुख सृष्टि शाहले सञ्चालन गरेकी थिइन् । अन्तरक्रिया मुख्यतया “विश्व लगानीकर्ता सप्ताह–२०२३” को मुख्य विषयवस्तुमा केन्द्रित थियो । लगानीकर्ताको लचिलोपन, क्रिप्टो सम्पत्ति र दिगो वित्त कार्यक्रमको यस अभियानको मुख्य विषयवस्तु हो भने ठगी र घोटाला रोकथाम, लगानीको आधारभूत प्रविधि र डिजिटल वित्त अन्य पूरक विषयवस्तु रहेका छन् । कार्यक्रममा लगानीकर्ता सप्ताह–२०२३ को मुख्य विषयवस्तुसँग नेपाली सेयर बजारका विभिन्न पक्षहरूको सम्बन्धका बारेमा पनि छलफल गरिएको थियो ।

उक्त कार्यक्रममा स्मार्ट लगानीकर्ताका विशेषतासहित नेपाली लगानीकर्ताको व्यावहारिक पक्षबारे पनि छलफल गरिएको थियो । महाप्रबन्धक ढुंगानाले कार्यक्रममा सहभागीहरूको जिज्ञासा समाधान गर्नुका साथै आगामी दिनमा पनि यस्तै अन्तरक्रिया कार्यक्रम आयोजना गर्ने प्रतिबद्धता व्यक्त गर्दै सबैमा “विश्व लगानीकर्ता सप्ताह–२०२३” को सफलताको शुभकामना समेत व्यक्त गरे ।