तीन कम्पनीले मागे आईपीओका लागि अनुमति

काठमाडौं । नेपाल धितोपत्र बोर्डसमक्ष थप तीनवटा कम्पनीले साधारण सेयर (आईपीओ) जारी गर्नका लागि अनुमति माग गर्दै आवेदन दिएका छन् । बोर्डका अनुसार सोलु हाइड्रोपावर, टक्सार पिखुवा खोला हाइड्रोपावर र एसवाई प्यानल लिमिटेडले साधारण सेयर निष्काशनको अनुमति माग गर्दै आवेदन दिएका छन् ।

सोलु हाइड्रोपावर कम्पनीले प्रतिकित्ता एक सय रुपैयाँ अंकित मूल्य कायम रहने गरी दुई अर्ब रुपैयाँबराबरको दुई करोड कित्ता साधारण सेयर निष्काशनका लागि अनुमति माग गरेको छ । बोर्डका अनुसार यसमा आयोजना प्रभावित क्षेत्रका स्थानीय जनता, वैदेशिक रोजगारीमा रहेका नेपाली नागरिक र सर्वसाधारणका लागि जारी गरिने सबै सेयर समावेश छ । कम्पनीको सेयर निष्काशन तथा बिक्री प्रबन्धक नबिल इन्भेष्टमेन्ट बैंकिङ लिमिटेड छ ।

टक्सार पिखुवा खोलाले पनि एक सय रुपैयाँ अंकित मूल्यका ४२ करोड ३० लाख ६६ हजार आठ सय रुपैयाँ बराबरको ४२ लाख ३० हजार छ सय ६८ कित्ता सेयर निष्काशन गर्न अनुमति मागेको छ । यस कम्पनीको सेयर निष्काशन तथा बिक्री प्रबन्धक प्रभु क्यापिटल लिमिटेड हो । यसैगरी, एसवाई प्यानल लिमिटेडले पनि ५२ करोड ३२ लाख ५४ हजार आठ सय रुपैयाँबराबरको साधारण सेयर निष्काशनका लागि अनुमति माग गर्दै बोर्डमा आवेदन दिएको छ । बोर्डका अनुसार सो कम्पनीले बिक्री प्रबन्धक प्रभु क्यापिटल लिमिटेडमार्फत् एक सय रुपैयाँ अंकित मूल्य कायम रहने गरी ५३ लाख ३२ हजार पाँच सय ४८ कित्ता साधारण सेयर निष्काशन गर्न अनुमति माग गर्दै आवेदन दिएको हो ।