नेपाल लाइफ अन्तर्राष्ट्रिय अवार्डबाट सम्मानित

काठमाडौं । नेपाल लाइफ इन्स्योरेन्स आउटस्ट्यान्डिङ पर्फमेन्स इन द लाइफ इन्स्योरेन्स इन्डस्ट्री अफ नेपालबाट सम्मानित भएको छ । कम्पनीलाई भारतको मुम्बईस्थित होटल ताज ल्यांड्स इंड्समा आयोजित चौथो आईसीसी इमार्जिङ एसिया इन्स्योरेन्स कन्केल्भ तथा अवार्ड, २०२३ समारोहमा यो सम्मान दिइएको हो ।

कम्पनीद्वारा गरिएको दाबी भुक्तानीको अनुपात, चुक्तापुँजी, प्रथम बीमा शुल्क आर्जन र कम्पनीद्वारा प्रशिक्षणमा गरिएको लगानीजस्ता मापदण्डलाई मूल्याङ्कन गर्दै नेपाल लाइफ इन्स्योरेन्स कम्पनीलाई यो सम्मान प्रदान गरिएको हो । सम्मान कम्पनीका प्रमुख कार्यकारी अधिकृत प्रवीणरमण पराजुलीले ग्रहण गरेका छन् । संसारमै लब्धप्रतिष्ठित परामर्शदाता पिडब्लुसीले एसियामा उदीयमान इन्स्योरेन्स कम्पनीको कार्यसम्पादन गर्ने प्रक्रियालाई समीक्षा गर्दै कम्पनीलाई विभिन्न विधामा सम्मानित गरेको हो । कम्पनीको कार्य कुशलता, प्रभावकारी एवम् पारदर्शी नीति तथा योजना, आम जनमानसको विश्वसनीयता र लोकप्रियता तथा चुस्त, सहज र विस्तारित सेवा प्रवाहको आधारमा सर्वश्रेष्ठ रहँदै कार्यसम्पादन गरेकाले कम्पनीलाई आउट्सटयान्डिङ पर्फमेन्स इन द लाइफ इन्स्योरेन्स इन्डस्ट्री अफ नेपालबाट सम्मानित गरिएको हो ।

कम्पनीका प्रमुख कार्यकारी अधिकृत प्रवीण रमण पराजुलीले अन्तर्राष्ट्रिय अवार्डबाट सम्मानित भएको सुखद् अवसरमा सफलताको श्रेय सञ्चालक समितिका अध्यक्ष तथा सदस्यहरू, सम्पूर्ण कर्मचारी, अभिकर्ता, नियामक निकाय, सेयरधनी तथा नेपाल लाइफसँग आबद्ध समस्त सेवाग्राहीलाई प्रदान गर्दै सफलताको बाटोमा अग्रसर रहन प्रेरित गर्ने सबैमा हार्दिक आभार प्रकट गरे । यसरी नै सामूहिक सहकार्य गर्दै जीवन बीमाको महत्व तथा यसको उपयोगिताको बारेमा अझै प्रभावकारी ढंगले नेपाली समाजलाई जागृत गराउँदै बीमाको लागि प्रोत्साहन गराउने कार्यमा नेपाल लाइफलाई अगाडि बढ्न सदैव हौसला मिल्ने अपेक्षा रहेको बताए ।