एलएस क्यापिटलले शिवशंकर इन्भेस्टमेन्टलाई कर्पाेरेट एडभाइजरी सेवा दिने

काठमाडौं । एलएस क्यापिटल र शिवशंकर इन्भेस्टमेन्ट प्राइभेट लिमिटेडबीच कर्पोरेट एडभाइजरी सेवा उपलब्ध गराउनेसम्बन्धी सम्झौता भएको छ । एलएस क्यापिटल, नयाँ बानेश्वरको कर्पोरेट कार्यालयमा एक कार्यक्रमका बीच एलएस क्यापिटलका प्रमुख कार्यकारी अधिकृत विजयलाल श्रेष्ठ र शिवशंकर इन्भेस्टमेन्ट प्राइभेट लिमिटेडका अध्यक्ष खगेश्वर बोहराले उक्त सम्झौतामा हस्ताक्षर गरेका हुन् ।

सम्झौताअनुसार एलएस क्यापिटलले रोड टु आईपीओअन्तर्गत शिवशंकर इन्भेस्टमेन्ट प्राइभेट लिमिटेडको प्रारम्भिक सार्वजनिक प्रस्ताव (आईपीओ)तर्फ लैजाने सबै सम्भावनाहरूको निरीक्षण र मूल्याङ्न गर्नेछ ।

शिवशंकर इन्भेस्टमेन्ट प्राइभेट लिमिटेड मुख्यतया जलविद्युत्, पूर्वाधार क्षेत्र र अन्य उत्पादनशील क्षेत्रहरूमा लगानीको व्यापक स्पेक्ट्रम केन्द्रित लगानी गर्ने कम्पनी हो । हाल कम्पनीले सानिगड हाइड्रो लिमिटेड, कलंगा हाइड्रो लिमिटेड र बुङ्गल हाइड्रो लिमिटेडलगायतका जलविद्युत् कम्पनीहरूमा लगानी गरेको छ भने अन्य सम्भाव्यता पनि खोजिरहेको छ । साथै, शिवशंकर इन्भेस्टमेन्ट प्राइभेट लिमिटेड र श्री गणेश इन्भेस्टमेन्ट मर्जरको प्रक्रियामा छन् । आईपीओ पश्चात् कम्पनीले चुक्ता पुँजी एक अर्ब रुपैयाँमाथि पुर्याउने योजना राखेको छ ।

लक्ष्मी सनराइज बैंक लिमिटेडको पूर्ण स्वामित्वमा रहेको सहायक कम्पनी एलएस क्यापिटलले मर्चेन्ट बैंकिङ क्षेत्रमा बलियो उपस्थिति देखाएको छ । इजाजत प्राप्त मर्चेन्ट बैंकरको रूपमा एलएस क्यापिटलले मर्चेन्ट बैंकिङसम्बन्धी बृहत् सेवाहरू प्रदान गर्दछ । जस्तैः आईपीओको प्रबन्धक, धितोपत्र अन्डरराइटिङ, पोर्टफोलियो व्यवस्थापन सेवाहरू प्रदान गर्ने, सेयर रजिस्ट्रार, कर्पोरेट एडभाइजरी सेवाहरू, विशेषीकृत लगानी कोष र म्युचुअल फन्डका लागि कोष प्रबन्धकको रूपमा सेवा समेत उपलब्ध गराउँदछ ।