समृद्धि फाइनान्सले ३६ करोड ३९ लाख रुपैयाँको हकप्रद सेयर जारी गर्ने

काठमाडौं ।
समृद्धि फाइनान्सले ३६ करोड ३९ लाख ६० हजार छ सय रुपैयाँबराबरको हकप्रद सेयर जारी गर्ने भएको छ । फाइनान्सले चुक्ता पुँजी वृद्धिको लागि हाल कायम रहेको चुक्ता पुँजी १८ करोड १९ लाख ८० हजार तीन सय रुपैयाँमध्येबाट एक सय रुपैयाँ अंकित मूल्य कायम रहने गरी ३६ लाख ३९ हजार छ सय छ कित्ता हकप्रद सेयर जारी गर्न लागेको हो ।

बिक्री प्रबन्धक बीओके क्यापिटल लिमिटेड रहेको फाइनान्सको यही असोज १६ गतेबाट खुला हुुने हकप्रद सेयरको बिक्री कार्य कात्तिक छ गतेसम्म जारी रहनेछ । अधिकृत पुँजी ८० करोड रुपैयाँ रहेको फाइनान्सको हाल चुक्ता पुँजी १८ करोड १९ लाख ८० हजार तीन सय रुपैयाँ रहेको छ । हकप्रद सेयरको बिक्रीपश्चात् भने फाइनान्सको चुक्ता पुँजी ५४ करोड ५९ लाख ४० हजार नौ सय रुपैयाँ पुग्नेछ । फाइनान्सले गत आर्थिक वर्षमा तीन करोड ८३ लाख ८३ हजार रुपैयाँ खुद मुनाफा आर्जन गरेको छ । अघिल्लो आवको सोही अवधिमा सस्थाको यस्तो नाफा ५४ लाख ९५ हजार रुपैयाँ रहेको थियो ।

हाल चुक्ता पुँजी १८ करोड १९ लाख ८० हजार रुपैयाँ रहेको संस्थाले गत आर्थिक वर्षको चौथौ त्रैमासिक अवधिमा २० करोड ५८ लाख ४९ हजार रुपैयाँ निक्षेप संकलन गरी एक करोड ८६ लाख ९० हजार रुपैयाँ कर्जा प्रवाह गरेको छ । सो अवधिमा तीन करोड नौ लाख ५५ हजार रुपैयाँ खुद ब्याज आम्दानी गरेको फाइनान्सको वितरणयोग्य नाफा भने दुई करोड ६६ लाख पाँच हजार रुपैयाँ रहेको छ । यस अवधिमा ८६ दशमलव ६४ प्रतिशत कर्जा निष्क्रिय रहेको फाइनान्समा १० दशमलव ५२ प्रतिशतको स्प्रेड दर रहेको छ ।

अघिल्लो आवको सोही अवधिमा भने फाइनान्सले सात करोड ५२ लाख ७४ हजार रुपैयाँ निक्षेप संकलन गरी छ लाख तीन हजार रुपैयाँ कर्जा प्रवाह गरेको थियो । उक्त अवधिमा ७१ लाख ५३ हजार रुपैयाँ खुद ब्याज आम्दानी गरेको फाइनान्समा शत प्रतिशत कर्जा निष्क्रिय रहेको थियो ।